ოცნების ხელისუფლების შს მინისტრის მოადგილის, ალექსანდრე დარახველიძეს განცხადებით, გამოძიებამ დაადგინა, რომ BBC-ის სტატია მომიტინგეებზე ქიმიური იარაღის გამოყენების შესახებ სრული სიცრუე იყო და "დამატებითი გამოძიების საჭიროება არ არსებობს".

"ცალსახად და ერთმნიშვნელოვნად განიმარტა, რომ შსს არც ერთი აკრძალული ნივთიერება არა გამოუყენებია. ასევე მიუთითა იმ ნივთიერების თაობაზე, რაზეც იყო საუბარი. თქვა რა ნივთიერება იყო გამოყენებული, კონკრეტული ფოტო მტკიცებულებებით, ასევე განცხადებაში მითითებული იყო თითოეული ნივთიერების თაობაზე, რაზეც თითქოს ეს იყო ისეთი აკრძალული ნივთიერება, რომელიც პირველი მსოფლიო ომის შემდეგ არ გამოყენებულა აღმოჩნდა, რომ ეს იყო სრული სიცრუე და შესაბამისად დამატებითი გამოძიების საჭიროება არ არსებობს. ასევე ბატონი პრემიერმინისტრის მხრიდან იყო გაჟღერებული, რომ თუ ვინმეს აქვს კიდე დამატებითი კითხვები, გარე აქტორებს მათ შეუძლიათ გაეცნონ საქმის მასალებს," — განაცხადა დარახველიძემ.

დღეს ოცნების პარლამენტმა რიგგარეშე სხდომაზე პარტია გახარია — საქართველოსთვის ინიციატივა უნდა განიხილოს, რომელიც დროებით საგამოძიებო კომისიის შექმნას და 2024 წლის ნოემბერ-დეკემბრის აქციაზე სამართალდამცავების მხრიდან ძალის გადამეტების და არაადამიანურ მოპყრობის ფაქტების შესწავლას ითვალისწინებს. რეგლამენტის მიხედვით, კომისიის შექმნის გადაწყვეტილებას 50 დეპუტატის მხარდაჭერა სჭირდება.

შეგახსენებთ, რომ BBC-ის გამოძიებაში ნათქვამია, რომ "ქართულმა ოცნებამ" გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა".