Washington Examiner-მა სტატია სათაურით: "საქართველოს ქიმიური იარაღის სკანდალი ტრამპის ყურადღებას იმსახურებს" გამოაქვეყნა, რომელიც BBC-ის საგამოძიებო ფილმს ეხება. სტატიაში აღნიშნულია, რომ საქართველოს მთავრობა BBC-ის გამოძიების შემდეგ მძაფრი კრიტიკის ობიექტი გახდა.

"საქართველოს მთავრობა, ამერიკული BBC-ის გამოძიების შემდეგ, მძაფრი კრიტიკის ქვეშ მოექცა. გამოძიება მიუთითებს, რომ ხელისუფლებამ საპროტესტო აქციებზე — რომლებიც მთავრობის რუსეთისკენ მიბრუნების წინააღმდეგ ტარდებოდა — შესაძლოა, პირველი მსოფლიო ომის დროინდელი ქიმიური ტოქსინები გამოიყენა. გასულ წელს ათასობით ადამიანი გამოვიდა ქუჩებში მას შემდეგ, რაც მმართველმა პარტიამ ქართულმა ოცნებამ გამოაცხადა, რომ ევროკავშირსა და NATO-სთან ინტეგრაციას აჩერებდა.

BBC-ის მოსაზრებით, არსებობს შესაძლებლობა, რომ ქართველმა ძალოვნებმა წყალში პირველ მსოფლიო ომში შექმნილი ტოქსინი, კამიტი აურიეს და შემდეგ იგი წყლის ჭავლის მანქანებით შეასხეს ათიათასობით დემონსტრანტს. ეს ყველაფერი დადასტურებული არ არის, თუმცა დაზარალებულთა ჩვენებები, სამედიცინო მონაცემები — რომლებიც კვირების განმავლობაში განგრძობად სიმპტომებზე მიუთითებს და პოლიციის ყოფილი თანამშრომლების მონათხრობი ხანგრძლივად მოქმედ ქიმიურ ნივთიერებაზე მიანიშნებს, რომელიც სტანდარტულ საზოგადოებრივი წესრიგის კონტროლის საშუალებებზე ბევრად ძლიერი ჩანს. ამას ემატება ისიც, რომ გასულ დეკემბერს 900-ზე მეტმა ქართველმა ექიმმა მოითხოვა მთავრობისგან აეხსნა რა ნივთიერება გამოიყენეს, რადგან მოქალაქეები ხანგრძლივ სიმპტომებზე ჩიოდნენ — თუმცა მათ პასუხი არ მიუღიათ", — წერია სტატიაში.

Washington Examiner-ის სტატიაში შეფასებულია საქართველოში ბოლო ერთი წლის განმავლობაში მიმდინარე მოვლენები. ამერიკული გამოცემა წერს, რომ ქვეყენაში სიტყვის თავისუფლების სივრცე თანდათან ვიწროვდება, რაც, მათი განმარტებით, მიუთითებს იმაზე, რომ აღარ არსებობს დამოუკიდებელი ორგანო, რომელსაც კამიტის შესაძლო გამოყენების გამოძიების სურვილი ან შესაძლებლობა ექნება. სტატიაში ხაზგასმულია ისიც, რომ "სასამართლოები, რომლებიც სულ უფრო ემორჩილებიან ქართული ოცნების პოლიტიკურ ნებას."

"სიტყვის თავისუფლების სივრცე თანდათან ვიწროვდება — ხელისუფლების კრიტიკა ონლაინ თუ "ოფლაინ" უკვე სამართლებრივ რისკს შეიცავს. მმართველი პარტია ასევე ახორციელებს რუსეთის სტილის "უცხოეთის აგენტების" კანონს, რათა გაყინოს ანგარიშები და აშშ-ს მიერ დაფინანსებული ორგანიზაციების დისკრედიტაცია მოახდინოს. სასამართლოები, რომლებიც სულ უფრო ემორჩილებიან ქართული ოცნების პოლიტიკურ ნებას, წინასწარ განსაზღვრულ გადაწყვეტილებებს იღებენ. პარალელურად, მთავრობამ დააკავა რვა ოპოზიციური ლიდერი ბუნდოვანი ბრალდებებით, რომლებიც მათ დასავლეთთან თანამშრომლობაში ადანაშაულებს. ხელისუფლება სამ მსხვილ ოპოზიციურ პარტიას კრძალავს.

ყველა სახელმწიფო ინსტიტუტი ხელისუფლების ნებაზეა დამყარებული. ეს ნიშნავს, რომ აღარ არსებობს დამოუკიდებელი ორგანო, რომელსაც კამიტიის შესაძლო გამოყენების გამოძიების სურვილი ან შესაძლებლობა ექნება. ოპოზიციურმა პარტიებმა საერთაშორისო საზოგადოებას მოუწოდეს, მოახდინონ ზეწოლა ქართულ ხელისუფლებაზე დამოუკიდებელი გამოძიების დასაშვებად, ხოლო დემონსტრანტები კვლავ აგრძელებენ ქუჩაში ყოფნას", — წერს Washington Examiner.

სტატიაში ასევე ვკითხულობთ, რომ ქართველი ხალხის გარდა — რომლებიც წინააღმდეგობას აგრძელებენ და ხელისუფლებისგან პასუხს ითხოვენ — მხოლოდ ვაშინგტონს შეუძლია მოახდინოს რეალური გავლენა საქართველოს მთავრობაზე.

"ვერც ერთი სხვა ძალა ვერ შეძლებს ეფექტურად დაარწმუნოს თბილისი, დაიცვას გამოხატვის თავისუფლება, შეწყვიტოს ჩინეთთან, რომელსაც პრემიერმინისტრი ახლა "სანიმუშო ზესახელმწიფოდ" მოიხსენიებს, ურთიერთობების გაღრმავება ან შეწყვიტოს რუსეთის სანქციებისთვის გვერდის ავლა," — წერს Washington Examiner.

შეგახსენებთ, BBC-ის ცნობით, ქართულმა ოცნებამ გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა.

ყველაფერი იქედან დაიწყო, რომ მოქალაქეებს უჩვეულო სიმპტომები გამოუვლინდათ, მაგალითად, გაძნელებული სუნთქვა, თავის ტკივილი, დაღლილობა, ხველება და ღებინება. უნდა ითქვას, რომ ბევრ მათგანს ეს სიმპტომები რამდენიმე კვირის განმავლობაში აღენიშნებოდა. დარბევებში მოყოლილი აქციის ერთ-ერთი მონაწილე იხსენებს, რომ წყლის ჭავლი თითქოს "წვავდა".

მეტი BBC-ის გამოძიებაზე: