თურქეთში ჟურნალისტთა უფლებადაცვითი ორგანიზაცია Reporters Without Borders-ის (რეპორტიორები საზღვრებს გარეშე) წარმომადგენელი ეროლ ონდეროღლუ დააკავეს. შემთხვევა 20 ივნისს მოხდა.

RWB-ს ინფორმაციით, თურქეთის ხელისუფლებამ ეროლ ონდეროღლუს "ტერორიზმის პროპაგანდის" მუხლით წაუყენა ბრალი, მიზეზი კი გახდა უფლებადამცველის მიერ 2016 წლის მაისი პრო-ქურთული მედიასაშუალებების დასაცავ კამპანიაში მონაწილეობა. მასთან ერთად კიდევ ორი ინტელექტუალი დააკავეს, რომლებიც ასევე ქურთულ გაზეთ Özgür Gündem-ის დასაცავ კამპანიაში იყვნენ ჩართულები.

რეპორტიორები საზღვრებს გარეშეს ინფორმაციით, თურქეთის ხელისუფლება ანტიტერორისტულ კანონმდებლობას აქტიურად იყენებს თავისუფალი მედიისა და სიტყვის თავისუფლების ჩასახშობად.

ეროლ ონდეროღლუ რეპორტიორები საზღვრებს გარეშეს თურქეთში 1996 წლიდან წარმოადგენს.

"ჩვენ არ შევწყვეტთ ბრძოლას მის გათავისუფლებამდე", - აცხადებს უფლებადაცვითი ორგანიზაცია. მათ შეიმუშავეს პეტიცია #FreeErol, რომელზეც ხელმოწერა ყველას შეუძლია. რეპორტიორები საზღვრებს გარეშე მოუწოდებს ყველას მთელს მსოფლიოში, მიაწვდინონ თავიანთი პროტესტის ხმა თურქეთის ელჩებს ყველა ქვეყანაში.