ფედერიკა მოგერინის განცხადებით, ევროკავშირის წევრი ქვეყნების ყველა საგარეო საქმეთა მინისტრი შეთანხმდა, რომ საქართველომ ეჭვგარეშედ სრულად შეასრულა სავიზო ლიბერალიზაციის კრიტერიუმები.

საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა ფედერიკა მოგერინიმ, პრესკონფერენციაზე აღნიშნა, რომ ახლა საქართველოს სავიზო ლიბერალიზაციის საკითხი დამოკიდებულია ევროკავშირის საბჭოს ჰოლანდიის ხელმძღვანელობაზე, რათაCoreper-ის უახლოეს დღის წესრიგში ჩასვან აღნიშნული საკითხი:

"მიუხედავად ამისა, ყველანი შევთანხმდით, რომ საქართველომ ბრწყინვალედ შეასრულა ნაკისრი ვალდებულებები და იმსახურებს, რომ რაც შეიძლება მალე მიენიჭოს სავიზო ლიბერალიზაცია".

პოზიტიურად აფასებს დღევანდელ შეხვედრას პირველი არხის კორესპონდენტი ქეთევან ქარდავა.

"არცერთი ქვეყანა საქართველოსთვის უვიზო რეჟიმის მინიჭებას არ ეწინააღმდეგება" - წერს ის ფეისბუკზე.

ქარდავა ლატვიის საგარეო საქმეთა მინისტრის კომენტარსაც აქვეყნებს:

"არიან წევრები, რომლებსაც უსაფრთხოებასთან დაკავშირებული საკითხები აღელვებთ, მაგრამ ისინიც კი აღიარებენ საქართველოს მიერ მიღწეულ პროგრესს და ამბობენ, რომ საქართველომ უნდა მიიღოს უვიზო მიმოსვლა. გადაწყვეტილებას დღეს არ ველოდით. ძალიან კმაყოფილი ვარ შეხვედით, უაღრესად პოზიტიური იყო. სამწუხაროდ ე.წ."დედლაინები" არ გვაქვს, მაგრამ ადრეული შემოდგომა - მე ასე მგონია".

დღეს, 20 ივნისს, ევროკავშირის საბჭომ საგარეო საქმეთა მინისტრების შემადგენლობით, ვიზალიბერალიზაცია ევროკავშირი-საქართველოს ურთიერთობების კონტექსტში განიხილა. შეხვედრას ფედერიკა მოგერინი ხელმძღვანელობდა.