რამზან კადიროვის ჯანმრთელობის მდგომარეობის გაუარესების შესახებ ცნობები ვრცელდება. კრემლში კი ჩეჩნეთში შესაძლო მემკვიდრეობით კრიზისთან დაკავშირებით დაძაბულობა იზრდება — სხვადასხვა ძალოვანი ჯგუფები ეძებენ კანდიდატს, რომელიც რამზან კადიროვის ადგილს დაიკავებს.

დამოუკიდებელი რუსული გამოცემა iStories-ის წყაროების განმარტებით, რომლებიც ფედერალური უსაფრთხოების სამსახურთან (FSB) არიან დაახლოებული, კადიროვს სურს ხელისუფლება საკუთარ 17 წლის შვილს, ადამ კადიროვს, გადააბაროს. წყაროების თქმით, კადიროვი ეძებს სამართლებრივ ან პოლიტიკურ მექანიზმს, რომელიც მას ამის შესაძლებლობას მისცემს. მოქმედი რუსული კანონმდებლობით, სახელმწიფო თანამდებობების პირდაპირი მემკვიდრეობით გადაცემა არ არის ნებადართული, ხოლო რეგიონების ხელმძღვანელებისთვის მინიმალური ასაკი 30 წელია.

ამავე დროს, პრეზიდენტის ადმინისტრაცია განიხილავს სხვა ფიგურასაც — სპეციალური დანიშნულების რაზმ "ახმატის" სარდალს, აპტი ალაუდინოვს. წყაროს თქმით, ალაუდინოვის მხარდამჭერები მას "ცივილიზებულ ჩეჩენ ძალოვნად" ახასიათებენ.

თუმცა, მისი სახელი ასევე უკავშირდება ჩეჩნეთის "საიდუმლო ციხეებში" წამების შესახებ ბრალდებებს. ალაუდინოვი სანქცირებულია აშშ-ს, ბრიტანეთის, ლატვიისა და უკრაინის მიერ — ადამიანთა უფლებების დარღვევისა და სამხედრო ოპერაციებში მონაწილეობისთვის.

ამის პარალელურად, FSB-ს წარმომადგენლები, iStories-ის ცნობით, კიდევ ერთ კანდიდატს უჭერენ მხარს — ჩეჩნეთის პარლამენტარ ადამ დელიმხანოვს. ანგარიშში არ ვრცელდება ინფორმაცია, თუ რა მოტივები აქვს უსაფრთხოების სამსახურებს მისი მხარდაჭერისთვის.

iStories-ის მიხედვით, რუსეთის პრეზიდენტ ვლადიმირ პუტინს კადიროვის შესაძლო მემკვიდრის შესახებ ჯერჯერობით საბოლოო გადაწყვეტილება არ მიუღია.

Novaya Gazeta Europe წერს, რომ კადიროვს 2019 წელს პანკრეასის ნეკროზი დაუდგინდა. მას შემდეგ პერიოდულად ვრცელდება ცნობები მისი შესაძლო ჰოსპიტალიზაციების შესახებ, ხოლო ოპოზიციური Telegram-არხები ხშირად ავრცელებენ ინფორმაციას მისი ჯანმრთელობის მდგომარეობის გაუარესებაზე.

2024 წლის აპრილში კადიროვმა ამ ჭორების გასაქარწყლებლად ვარჯიშის ვიდეო გამოაქვეყნა. თუმცა, Novaya Gazeta Europe მათ მიერ გამოქვეყნებულ სტატიაში აღნიშნავს, რომ 2025 წელს მისი მდგომარეობა მკვეთრად დამძიმდა — მათი ცნობით, თებერვალში იგი რამდენიმე კვირის განმავლობაში იმყოფებოდა გროზნოში მდებარე კერძო კლინიკაში, რომელიც მისივე მეუღლეს, მედნი კადიროვას ეკუთვნის.

2025 წლის მაისში, ჯანმრთელობის შესახებ მორიგი სპეკულაციების ფონზე, კადიროვმა გამოაქვეყნა ვიდეო ამ ტექსტით: "მე ვიცხოვრებ იმდენ ხანს, რამდენიც ჩემთვის არის განკუთვნილი. სიკვდილი თითოეული ადამიანის გზაა".

პარალელურად, კადიროვის პრესსამსახური რეგულარულად ავრცელებს ვიდეოებს, სადაც ის ვარჯიშობს და აქტიურად გამოიყურება. ოქტომბრის ბოლოს გავრცელდა კადიროვის კადრებიც, სადაც ის ძალოსნობითაა დაკავებული.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.