თბილისის საქალაქო სასამართლოს მოსამართლემ ელენე გოგუაძემ ჯგუფური ძალადობის ფაქტზე დაკავებული თორნიკე თოშხუა და მინდია შერვაშიძე პატიმრობაში დატოვა.

დღევანდელ სხდომაზე დაცვის მხარემ შესავალი სიტყვა წარმოთქვა, ასევე დაიკითხა საქმის მთავარი გამომძიებელი და ინფორმაციული პატაკის ავტორი პოლიციელი. ამასთან, გადაისინჯა დაკავებულების მიმართ შეფარდებული აღკვეთის ღონისძიება პატიმრობა და ის ძალაში დარჩა.

თორნიკე თოშხუასა და მინდია შერვაშიძის ადვოკატის, ომარ ფურცელაძის განმარტებით, ბრალდებულების მიმართ განგრძობადი პატიმრობის გამოყენების საფუძველი არ არსებობს. უფლებადამცველი დაკავებულების მიმართ 5000-5000-ლარიანი გირაოსა და სხვა შემზღუდავი ღონისძიებების გამოყენებას შუამდგომლობდა.

მინდია შერვაშიძე და თორნიკე თოშხუა შინაგან საქმეთა სამინისტრომ 16 აგვისტოს დააკავა. მათ ბრალი ჯგუფურად ჩადენილ ძალადობაში ედებათ, რაც საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით (ძალადობა, ჩადენილი ჯგუფურად) წარედგინათ, რაც სასჯელის სახედ და ზომად ორ წლამდე თავისუფლების აღკვეთას ითვალისწინებს.