16 აგვისტოს ჯგუფურად ჩადენილი ძალადობის ბრალდებით დაკავებულ რუსთაველის აქციის მონაწილეებს — თორნიკე თოშხუას და მინდია შერვაშიძეს მოსამართლე ეკა ბარბაქაძემ აღკვეთი ღონისძიების სახით პატიმრობა შეუფარდა.

პროკურორი ნინო ჟვანია აქტივისტებისთვის პატიმრობის შეფარდებას ითხოვდა. მისი თქმით, ბრალდებულებმა, ამჟამად გამოძიებისთვის დაუდგენელ სხვა პირებთან ერთად ფიზიკური ზიანი მიაყენეს ბექა გოცირიძეს. პროკურორმა განმარტა, რომ თოშხუა და შერვაშიძე თავად გოცირიძემ ამოიცნო.

აქციის მონაწილეების თქმით, 31 ივლისს, რუსთაველის გამზირზე მომხდარი დაპირისპირების დროს ინციდენტის ერთ-ერთ ფიგურანტს, ქართული ოცნების აქტივისტს და ყოფილ ფეხბურთელს, ბექა გოცირიძეს დანა ამოუვარდა, რომელიც მათ პატრულის თანამშრომლებს გადასცეს, რის შემდეგაც პოლიციამ გოცირიძე ტერიტორიას განარიდა.

იურისტი საბა ბრაჭველი 16 აგვისტოს წერდა, რომ 31 ივლისს "ბექა გოცირიძე ჯიბეში დანით და ხმამაღალი გინებით რუსთაველზე მივიდა, ჩხუბი თვითონ ატეხა, და პოლიციამ კი ის ადამიანები დაიჭირა, ვინც მას დანა წაართვეს".

დღევანდელ სხდომაზე პროკურატურის ამტკიცებდა, რომ საქმეში დანა ობიექტურად არ არსებობს. "დაზარალებულს თან დანა არ ჰქონია. შესაძლებელია დაცვის მხარემ განსხვავებული პოზიციები დააფიქსირონ, მაგრამ ობიექტური ჭეშმარიტება არის ის, რომ დაზარალებულს დანა არ ჰქონია.", — განაცხადა პროკურატურის წარმომადგენელმა სხდომაზე.

შემდეგი სასამართლო სხდომა 6 ოქტომბერს გაიმართება.