ოცნების ხელისუფლების საგარეო საქმეთა მინისტრი მაკა ბოჭორიშვილი ქართული ოცნების საკანონმდებლო ინიციატივას გამოეხმაურა იმის შესახებ, რომ ემიგრანტებს უცხოეთში არჩევნებში მონაწილეობის მიღება ეზღუდებათ.

ბოჭორიშვილის თქმით, "არანაირად არ ხდება საქართველოს მოქალაქეების შეზღუდვა არჩევნებში მონაწილეობასთან დაკავშირებით. ყველას აქვს უფლება მონაწილეობა მიიღოს არჩევნებში".

"არანაირად არ ხდება საქართველოს მოქალაქეების შეზღუდვა არჩევნებში მონაწილეობასთან დაკავშირებით. ყველას აქვს უფლება მონაწილეობა მიიღოს არჩევნებში. ციფრები კარგი დასტური იქნება, თუ რა გავლენა შეიძლება მოახდინოს არჩევნებზე მაგალითად, საზღვარგარეთ არჩევნების ჩატარებამ. ფაქტობრივად — არანაირი. ეს ერთი, თუმცა მეორე მხრივ, როდესაც ვხედავთ, თუ როგორ ხდება არჩევნების საკითხის გამოყენება გავლენების მოსახდენად, ეს არის უკვე მეორე საკითხი.

ისევ და ისევ დემოკრატიის პრინციპების დასაცავად, ჩვენი მოქალაქეების საარჩევნო უფლებების დასაცავად და ჩვენი ქვეყნის სტაბილურობის დასაცავად ეს არის სწორი ნაბიჯი", — თქვა მაკა ბოჭორიშვილმა.

ქართული ოცნება საარჩევნო კოდექსში ცვლილებებს გეგმავს, რომლის მიხედვითაც საზღვარგარეთ მყოფი მოქალაქეები არჩევნებში მონაწილეობას ვერ შეძლებენ, 4 წელიწადში ერთხელ, სამშობლოში თუ არ ჩამოვლენ ხმის მისაცემად, — ამის შესახებ ოცნების პარლამენტის თავმჯდომარემ, შალვა პაპუაშვილმა ბრიფინგზე განაცხადა. მისი თქმით, "საარჩევნო კოდექსში" ცვლილებები წლის ბოლომდე განხორციელდება.