"ოცნების" პარლამენტის თავმჯდომარის, შალვა პაპუაშვილის აზრით, ანტიკორუფციული ბიუროს საქმიანობა დამაკმაყოფილებელია და ვერ ხედავს კუპრაშვილის გათავისუფლების საფუძვლებს. რაც შეეხება ბიუროს შესაძლო გაუქმებასთან დაკავშირებით დასმულ კითხვას, მან ჟურნალისტებთან საუბრისას თქვა, რომ პრემიერისა და მთავრობის პრეროგატივაა წარმოადგინონ ხედვები სტრუქტურულ მოწყობასთან დაკავშირებით.

"რაც შეეხება ანტიკორუფციული ბიუროს საქმიანობას, ნახეთ, რომ დროთა განმავლობაში მათ შორის ფუნქციები დაემატა, რაც რა თქმა უნდა, განსაკუთრებით პასუხისმგებლობაა, რომ თავდაპირველი ფუნქციისგან, რომელიც იყო საჯარო მოხელეების დეკლარაციების შევსების უზრუნველყოფა, დაემატა სტრატეგიის შემუშავება, უცხოური დაფინანსების კონტროლი და ასე შემდეგ, რაც რა თქმა უნდა გამოწვევებს წარმოადგენს, თუმცა ის, როგორც ბიურო საქმიანობს, ვფიქრობ, რომ არის დამაკმაყოფილებელი ამ მხრივ.

...მთავარი გამოწვევა, რაც ამ უწყებას აქვს, არის მისი დასახელება. თქვენ რომ გესმით დასახელება "ანტიკორუფციული ბიურო", ფიქრობთ, რომ ეს არის საგამოძიებო უწყება, რომელიც კორუფციას უშუალოდ თავად ებრძვის და ეს ასე არ არის", — თქვა შალვა პაპუაშვილმა.