ხორვატიაში, ქვეყნის დასავლეთ ნაწილში, ხუთშაბათს თურქეთში რეგისტრირებული თვითმფრინავი ჩამოვარდა. ადგილობრივი მედიის ცნობით, პილოტი დაიღუპა. ამის შესახებ ინფორმაციას AP ავრცელებს.

ხორვატიის შინაგან საქმეთა სამინისტროს მიერ გავრცელებულ განცხადებაში აღნიშნულია, რომ Air Tractor AT-802 ტიპის თვითმფრინავი რადარიდან ადგილობრივი დროით დაახლოებით საღამოს 5 საათისთვის გაქრა. დაახლოებით 20 წუთში საგანგებო სამსახურს აცნობეს, რომ ქალაქ სენისთან, ადრიატიკის ზღვის სანაპიროს მახლობლად, თვითმფრინავი ცეცხლში იყო გახვეული.

პოლიციის ინფორმაციით, თვითმფრინავი მოძრაობდა მარშრუტით ჩრდილოეთის პორტ რიეკადან ზაგრებისკენ და უკან.

ხორვატიის საზოგადოებრივი მაუწყებელი HRT იუწყება, რომ თვითმფრინავი თურქეთის სატყეო უწყებას ეკუთვნოდა. HRT-ის ცნობით, მაშველებმა პილოტის ცხედარი ცეცხლის ჩაქრობის შემდეგ იპოვეს. ბორტზე სხვა არავინ იმყოფებოდა.

ცნობისთვის, თურქული სამხედრო თვითმფრინავი, 11 ნოემბერს, სიღნაღის მუნიციპალიტეტშიც ჩამოვარდა. ინფორმაცია შსს-მ გაავრცელა. ბორტზე მყოფი ოცივე ადამიანი გარდაიცვალა.