პარტია გახარია საქართველოსთვის წევრი ნათია მეზვრიშვილი გიორგი გახარიასთვის ბრალის წარდგენასა და პატიმრობის შეფარდებას ეხმაურება. ის წერს, რომ გიორგი "გახარია ოცნების ერთადერთი პოლიტიკური თანამდებობის პირი იყო, რომელიც არ იყო კორუმპირებული და სძულდა ნეპოტიზმი და ამ ღირებულებების გამო აღმოჩნდა სახელმწიფოს მოღალატე და ამ ღირებულებების ერთგულება მიიყვანს გამარჯვებამდე".

"ერთ დღეში ორი პატიმრობა სახელმწიფო ინტერესების ყოველთვის და ყველაფერზე (პირადზე, ოჯახზე, მეგობრებზე) წინ დაყენებისთვის.

გახარია "ოცნების" ერთადერთი პოლიტიკური თანამდებობის პირი იყო, რომელიც არ იყო კორუმპირებული და სძულდა ნეპოტიზმი.

ამ ღირებულებების გამო აღმოჩნდა სახელმწიფოს მოღალატე, ანტიეროვნულ და კორუმპირებულ ოცნებასთან შეუთავსებელი და ამ ღირებულებების ერთგულება მიიყვანს გამარჯვებამდე. სრულიად უცხო ადამიანი გასაუბრებით დამნიშნა მოადგილედ. ასე პოულობდა კადრებს. ისე წავიდა თანამდებობიდან, არაფერი წაუღია. საერთოდ არაფერს ჰქონდა მისთვის მნიშვნელობა სახელმწიფო საქმის კეთილსინდისიერად კეთების გარდა.

ამ ღირებულებების ადამიანის გატევა წარმოუდგენელია. მხოლოდ ის დაპატარავებული "ადამიანები" მეცოდებიან, რომლებიც გუშინ ბუზებივით ეხვივნენ და ახლა აორთქლებულები არიან, მეტიც მის წინააღმდეგ მოწმეებად გვევლინებიან. თქვენი ადგილი არც მაშინ იყო მის გარშემო (ეს იყო მისი ერთადერთი შეცდომა) და არც მომავალში იქნება.

პროკურატურამ არაერთი ადამიანი გააუბედურა ბოლო დროს, გახარია რა მოსატანია. მაგრამ მაინც — გავრცელებული განცხადების, კვალიფიკაციის და ყველაფრის, მე შემრცხვა, ძალიან შემრცხვა, როგორც თქვენს ყოფილ კოლეგას", — წერს სოციალურ ქსელში ნათია მეზვრიშვილი.

შეგახსენებთ, სასამართლომ დააკმაყოფილა პროკურატურის შუამდგომლობა და ე.წ ჩორჩანას ეპიზოდზე ყოფილ პრემიერმინისტრს, გიორგი გახარიას პატიმრობა დაუსწრებლად შეუფარდა.

პროკურატურის განმარტებით, საშიშროებაა ახალი დანაშაულის ჩადენის, მოწმეებზე ზემოქმედების და მიმალვის. გადაწყვეტილება მოსამართლე დავით კურტანიძემ მიიღო. გიორგი გახარია სასამართლო სხდომას არ დასწრებია. ის საქართველო მიმდინარე წლის ივნისში დატოვა.

გუშინ, 12 ნოემბერს ცნობილი გახდა, რომ პროკურატურამ გიორგი გახარიას მიმართ 20-21 ივნისის საქმეზე და ჩორჩანას ეპიზოდზე სისხლის სამართლის დევნა დაიწყო.