ოცნების პარლამენტის თავმჯდომარის მოადგილემ, თეა წულუკიანმა სამთავრობო ტელეკომპანია იმედის ეთერში თქვა, რომ წყალივით სჭირდებათ განსხვავებული აზრი. მან ისიც თქვა, რომ მათ, ქართულ ოცნებას, "ოპონენტების გაქრობა კი არ უნდა, სასიცოცხლოდ სჭირდება რაც შეიძლება მეტი ოპონენტი".

"ჩვენ ოპონენტების გაქრობა კი არ გვინდა, სასიცოცხლოდ და წყალივით გვჭირდება რაც შეიძლება მეტი ოპონენტი.

…პარლამენტში როდესაც არის, ვთქვათ ორი ოპოზიციური ჯგუფი, ეს არის "ხალხის ძალა" და "ევროპელი სოციალისტები", ზოგიერთ ჩასაფრებულ ადამიანს ჰგონია, რომ ისინი მუდმივად ტაშს გვიკრავენ ყველაფერზე. ეს ნამდვილად ასე არ არის, არის ხოლმე ისეთი შიდა ჭიდილი და განხილვები, რომ ყოფილა მათი აზრის არაერთხელ გათვალისწინება. ზოგი პარტია ასეთ ფორმას ირჩევს, ზოგი პარტია ირჩევს სხვა ფორმას, მაგრამ მთავარია, რომ არსებობდეს განსხვავებული აზრი. ოპონენტს რომ ვეძახით, ეს საჭიროა იმიტომ, რომ რაც არ უნდა მე ან ჩემნაირებს, ჩვენი გუნდის წევრებს განსხვავებული აზრი გვქონდეს, ჩვენ ერთი გუნდი ვართ. გვაქვს პარტიული დისციპლინა, სხვანაირად პარტია არ არსებობს და განსხვავებული აზრისთვის არის ოპოზიცია. მან უნდა თქვას ის, რაც არის სათქმელი. შესაბამისად, ჩვენ წყალივით გვჭირდება განსხვავებული აზრი, მაგრამ ის, ვინც აწამებდა, აუპატიურებდა, ართმევდა, ახალაიების, მეგის ქარდავას, ზურა ადეიშვილის, სხვათა და სხვათა ხელით და მიშა სააკაშვილის ხელმძღვანელობით, ასევე ერთ-ერთ სქემაში ძალიან აქტიურად იყო ბიზნესის რეკეტში ჩართული "თიბისი ბანკი", მამუკა ხაზარაძე, ბადრი ჯაფარიძე, ეს ხალხი ვერ იქნება პოლიტიკური ველის დამაბინძურებელი იმიტომ, რომ ისინი უშლიან ხელს იმას, რომ აღმოცენდეს რეალური, მწვავე, გნებავთ მკვახე, გნებავთ აგრესიული, მაგრამ ჯანსაღი ოპოზიცია", — თქვა ოცნების პარლამენტის თავმჯდომარის მოადგილემ, თეა წულუკიანმა.