გუშინ, პარლამენტის წინ მოშიმშილე თამაზ მაჭავარიანი შეუძლოდ გახდა და სასწრაფო ეკიპაჟის წევრებმა კლინიკაში გადაიყვანეს. "კოალიცია ცვლილებებისთვის" ერთ-ერთი წევრის, გედევან ფოფხაძის განცხადებით მაჭავარიანი დღეს დილით გამოწერეს კლინიკიდან, მისი ჯანმრთელობის მდგომარეობა სტაბილურია და პარლამენტთან აგრძელებს შიმშილობას.

გედევან ფოფხაძემ კომენტარი გააკეთა პროპაგანდისტული მედია "იმედის" გავრცელებულ კადრებზე, სადაც, მათი თქმით, მოშიმშილე საკვებს იღებს. ფოფხაძის განმარტებით მოშიმშილეები ყოველ დღე ეზიარებიან და აღნიშნულ კადრებში მოშიმშილე სეფისკვერს იღებს. მისივე თქმით, დღეს შიმშილობის მე-16 დღეა.

1-ელ ნოემბერს, თამაზ მაჭავარიანმა “ტვ პირველს” განუცხადა, რომ ის “ოცნების” მმართველობის დროს, 2016 წელს, ციხეში იჯდა, რა დროსაც მას ჯანმრთელობის პრობლემები შეექმნა და საავადმყოფოში გადაყვანა დასჭირდა. მაჭავარიანის განცხადებით, მას მსუბუქი ჯანმრთელობის პრობლემა აღენიშნებოდა ფეხზე და ოპერაციის გაკეთება დასჭირდა — ოპერაციიდან 36 საათის შემდეგ "მიცვალებულივით თეთრ ზეწარში ვიყავი გახვეული მთლად, ხელები გულზე დაწყობილი, პირი აკრული, ფეხები გაკოჭილი, მღვდელი მადგა თავზე და მაზიარებდა". მოშიმშილის განცხადებით, მან მრავალჯერ მიმართა თენგიზ შარმანაშვილს ციხიდან მისი ჯანმრთელობის მდგომარეობის შესახებ, მაგრამ რეაგირება არ მოჰყოლია მის მოთხოვნას გასწეოდა შესაბამისი სამედიცინო დახმარება.

"2016 წელს ვიჯექი ციხეზე, ყველა ექიმმა შემამოწმა, ვიყავი სრულიად ჯანმრთელი, მქონდა მხოლოდ მარცხენა ფეხის ცერა თითზე სოკოვანი დაავადება. გადამიყვანეს საავადმყოფოში, 5 ბადრაგი მახლდა, ნარკოზი გამიკეთეს, დამაძინეს, ადამიანი რომ ვერ გამოიღვიძებდა ისე. გამომეღვიძა 34 საათის მერე, როგორც მიცვალებულია თეთრ ზეწარში ვიყავი გახვეული მთლად, ხელები გულზე დაწყობილი, პირი აკრული, ფეხები გაკოჭილი, მღვდელი მადგა თავზე და მაზიარებდა. თეა წულუკიანი სხვის საქმეს თუ იძიებს, ვალდებულია თავისიც გამოიძიოს, ეგ იყო იუსტიციის მინისტრი მაშინ. ყველასთან ვითხოვ შეხვედრას, მაგრამ არავინ არ მხვდება. თენგიზ შარმანაშვილმა გაიარა, ვუძახე და სულ არ მოუხედია აქეთ. იცის, რომ მეშვიდე დღეა აქ ვშიმშილობ. სხვას რომ ასამართლებ, ჯერ შენი თავი გაისამართლე," — განაცხადა 1 ნოემბერს მაჭავარიანმა ტვ პირველთან საუბრისას.

ცნობისთვის, 28 ოქტომბერს გედევან ფოფხაძესთან ერთად შიმშილობა აქტივისტებმა დავით ჭელიძემ, კახა ელიოზიშვილმა, თამაზ მაჭავარიანმა და დარეჯან ცხვიტარიამ დაიწყეს. შსს-მ ერთ-ერთი მოშიმშილე დავით ჭელიძე 28 ოქტომბერს რუსთაველის გამზირის ხელოვნურად გადაკეტვის ბრალდებით დააკავა. მოსამართლე ზვიად ცეკვავამ მას 14-დღიანი ადმინისტრაციული პატიმრობა შეუფარდა. მას შემდეგ, რაც დავით ჭელიძემ იზოლატორი დატოვა ის პარლამენტის წინ აგრძელებს შიმშილობას.