არქიმანდრიტი დოროთე ყურაშვილი საპატრიარქოსთან მივიდა, მაგრამ რაკი საპატრიარქომ ეპარქიული კომისიის სხდომაზე მედიის წარმომადგენლების დასწრებაზე უარი თქვა, ის სხდომას არ ესწრება.

მისი თქმით, საპატრიარქოში ეპარქიული კომისიის სხდომაზე საჯარო გამოსვლების გამო დაიბარეს, ამიტომ სხდომაზე დასწრებას ჟურნალისტებთან ერთად ითხოვდა.

"ამათ, ერთადერთი, რაც შეუძლიათ, მოიმიზეზონ ჩემს დასასჯელად, ეს არის სხდომაზე არგამოცხადება — ანუ რჯულის კანონით, როცა ეპისკოპოსი გიბარებსო, მაშინ აუცილებლად უნდა მიხვიდე, თუ არადა, დაისჯებიო. მე ეპისკოპოსი კი არ მიბარებს, მე მიბარებენ კომისიაზე და როცა კომისიაზე მიბარებენ, მე ბრალდებაც უნდა ვიცოდე, მათი აზრი უნდა ვიცოდე ჩემზე, რა დავაშავე. აი, ჩემი გამონათქვამები რომ გამომიგზავნეს, იქ უნდა ყოფილიყო "აი, შენ ეს რომ თქვი, ეს არის მწვალებლობა, ეს არის შეცდომა, ეს არის არასწორი". ასეთი დასკვნები არ იყო, იყო უბრალოდ ჩემი გამონათქვამები და ჩემი გამონათქვამები მე ისედაც ვიცი. ჩემს გამონათქვამს მე ისევ ვიტყვი. იქ იყო მხოლოდ და მხოლოდ პოლიტიკური ანუ საჯარო მდგომარეობაზე რომ ვამახვილებდი ყურადღებას, ამაზე იყო ჩემი გამონათქვამები, რაც ხდება საქართველოში და საქართველოს ეკლესიაში. და მხოლოდ და მხოლოდ პოლიტიკურად ეწყინათ და პიროვნულად. სხვანაირად იქ სწავლებითი არაფერი იყო. მეც რაღაცები, მათი განცხადებები რუსეთის საამებელი, არ მომწონს, მაგრამ მე არცერთის დასჯა არ მომითხოვია, იმიტომ, რომ ამის გამო არ შეიძლება, მღვდელი დაისაჯოს. ამიტომ, მათ უნდოდათ მიზეზი. პოლიტიკური განცხადებების გამო ჩემი დასჯა შეუძლებელია და ახლა უნდათ მიზეზი, რომ მეორედ თუ არ გამოვცხადდები, დამსჯიან. ამიტომ მე ვთქვი "მოვდივარ", მაგრამ მხოლოდ საჯაროდ. მე ჩემი მოთხოვნა მაქვს, უნდა შევიდე ჟურნალისტებთან ერთად და ეს უნდა გახდეს საჯაროდ. იმათმა მითხრეს, რომ სხდომა არ შეიძლება, ჟურნალისტებმა გადაიღონო, ეს არის ტყუილი. არ შეიძლება, გადაიღონ, ჩაიწერონ, როცა ადამიანის პიროვნულ, პირად ცოდვაზეა საუბარი. მე რომ მთხოვდნენ ახლა რაღაც გადაცდომებს არა სწავლებაში, არამედ ცხოვრებაში ვიღაცასთან, რაღაცასთან, ზნეობრივი, მაშინ მათ შეუძლიათ, რომ მე ამიკრძალონ ჩაწერაც... მე მთხოვენ პასუხს სწავლებაზე. რა აქვთ დასამალი, რატომ იმალებიან? დაამტკიცონ თავიანთი სწავლება, დაამტკიცონ, რომ ის, რასაც ამბობენ, სწორია, დაამტკიცონ, რომ რუსეთი ჩვენი მოყვარეო, დაამტკიცონ, რომ ევროპა ჩვენი მტერია. დაამტკიცონ, რას იმალებიან?" — თქვა არქიმანდრიტმა (ტექსტს "ტვ პირველი" ავრცელებს).

არქიმანდრიტი დოროთე საეპარქიო კომისიაზე 16 ოქტომბრის შემდეგ მეორედ, 29 ოქტომბერს დაიბარეს — არქიმანდრიტის თქმით, ის მხოლოდ იმ შემთხვევაში წარდგებოდა საპატრიარქოში, თუ საპატრიარქო მედიას დართავდა კომისიაზე დასწრების უფლებას.

საპატრიარქოს საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ 25 ოქტომბერს სოციალურ ქსელში გამოაქვეყნა პატრიარქის მდივნის, დეკანოზ მიქაელ ბოტკოველის შეტყობინებას არქიმანდრიტ დოროთესადმი, სადაც ეწერა, რომ "ტელევიზიების მონაწილეობით ეპარქიული კომისიის ხდომა ვერ და არ გაიმართება".