ანტიკორუფციული ბიურო "საერთაშორისო გამჭვირვალობა საქართველოს" (TI) გავრცელებულ ინფორმაციას სიცრუეს უწოდებს. TI-ს ინფორმაციით, ანტიკორუფციული ბიურო თანამდებობის პირთა ქონებრივი მდგომარეობის დეკლარაციებს მეორე თვეა აღარ აქვეყნებს.

ანტიკორუფციული ბიუროს ინფორმაციით, საქართველოს კანონში 2024 წლის 9 სექტემბერს განხორციელებული ცვლილების მიხედვით, ყველა თანამდებობის პირის ქონებრივი მდგომარეობის დეკლარაციის შემოწმებას 2-თვიან ადმინისტრაციულ წარმოების ვადა აქვს, ხოლო აღნიშნულ პერიოდში კი, დეკლარაციის გასაჯაროება ან მასში ასახული ინფორმაციის საჯარო ინფორმაციის სახით გაცემა დაუშვებელია. ბიურომ მოუწოდა TI-ს არ გაავრცელოს "ცრუ და გადაუმოწმებელი ინფორმაცია".

"კორუფციის წინააღმდეგ ბრძოლის შესახებ“ საქართველოს კანონი, მუხლი 14, პუნქტი 12:

"თუ თანამდებობის პირის ქონებრივი მდგომარეობის დეკლარაცია ხარვეზს შეიცავს, ანტიკორუფციული ბიურო შესაბამის პირს ამ დეკლარაციის წარდგენიდან 1 თვიან პერიოდში მიუთითებს აღნიშნულ ხარვეზზე და მის აღმოსაფხვრელად 1 თვიან ვადას განუსაზღვრავს. აღნიშნული 1 თვიანი პერიოდის ან 1 თვიანი ვადის განმავლობაში ამ დეკლარაციის გასაჯაროება ან მასში ასახული ინფორმაციის საჯარო ინფორმაციის სახით გაცემა დაუშვებელია".

მოვუწოდებთ, ყველა დაინტერესებულ პირს, ნუ გაავრცელებენ გადაუმოწმებელ და ცრუ ინფორმაციას!" — ვკითხულობთ ბიუროს განცხადებაში.

TI-ს განცხადებაში ასევე ვკითხულობთ, რომ ეს უკვე მეორე შემთხვევაა, რაც ბიურომ არ გამოაქვეყნა დროულად დეკლარაციები — "პირველ შემთხვევაში დეკლარაციები 6 თვის განმავლობაში, 2024 წლის დეკემბრიდან 2025 წლის ივნისამდე იყო დახურული ე.წ. "ტექნიკური ხარვეზის" გამო".