ფინური გამოცემა Helsingin Sanomat წერს, რომ ეუთოს თავმჯდომარემ და ფინეთის საგარეო საქმეთა მინისტრმა ელინა ვალტონენიმ თავად გააუქმა ირაკლი კობახიძესთან შეხვედრა.

ფინური გამოცემა წერს, რომ ოცნების ხელისუფლების მთავრობა ფინეთის საგარეო საქმეთა მინისტრს "უკანონო საარჩევნო ღონისძიებაში" მონაწილეობასა და "ცრუ განცხადებების გავრცელებაში" ადანაშაულებს.

ვალტონენი HS-თან სატელეფონო საუბარში აცხადებს, რომ "პრემიერმინისტრ კობახიძესთან შეხვედრა არა საქართველოს, არამედ ფინეთის ინიციატივით გრაფიკის ცვლილების გამო გაუქმდა და ამის შესახებ საქართველოს მხარეს გუშინ ღამით აცნობეს".

ვალტონენი უარყოფს საქართველოს მთავრობის მტკიცებას, რომ მან მონაწილეობა მიიღო რაიმე საარჩევნო ღონისძიებაში ან გაავრცელა რაიმე ცრუ ინფორმაცია.

"მე სპეციალურად მოვედი, რომ მენახა პროტესტი, რომელიც საქართველოში კვირების და თვეების განმავლობაში გრძლედება. მინდოდა გამომეხატა ჩემი მხარდაჭერა სიტყვის თავისუფლების მიმართ", — ამბობს ვალტონენი.

ჟურნალისტის კითხვაზე, რას ფიქრობთ საქართველოს მთავრობის რეაქციაზე? ეუთოს თავმჯდომარე პასუხობს:

"საქართველოს მთავრობაზეა დამოკიდებული, როგორ რეაგირებენ. სამწუხაროდ, მე თვითონ მომიწია რეაგირება პრემიერმინისტრთან შეხვედრის გაუქმებით, რათა აზერბაიჯანში ჩავსულიყავი".

ვალტონენი საქართველო დაგეგმილზე ადრე დატოვა, რათა აზერბაიჯანის პრეზიდენტ ილჰამ ალიევთან და საგარეო საქმეთა მინისტრ ჯეიჰუნ ბაირამოვს შეხვედროდა. მას ვიზიტის დასაწყისში ჰქონდა შეხვედრა დაგეგმილი აზერბაიჯანის მხარესთან, თუმცა გეგმა მას შემდეგ შეიცვალა, რაც აზერბაიჯანის ხელმძღვანელობა ეგვიპტეში გაემგზავრა, სადაც აშშ-ის პრეზიდენტ დონალდ ტრამპი ღაზას ომის შესახებ სამშვიდობო სამიტს მასპინძლობდა.

ფინური გამოცემა წერს, რომ "მმართველი პარტია ქართული ოცნება სულ უფრო ავტორიტარული ხდება. ქვეყანამ დააპატიმრა ოპოზიციის რამდენიმე წარმომადგენელი და მიიღო კანონი, რომელიც უცხოური დაფინანსების მიმღებ ორგანიზაციებს "უცხოელ აგენტებად" რეგისტრაციას ავალდებულებს. როგორც ჩანს, კანონი რუსეთიდან არის კოპირებული.

ქართული ოცნება მთავრობას 2012 წლიდან ხელმძღვანელობს და ქვეყანა რუსეთთან უფრო ახლოს დააახლოვა. ევროკავშირმა, თავის მხრივ, გაყინა საქართველოს წევრობის პროცესი.

საქართველოს რეალურ ლიდერად, პრემიერ კობახიძის ნაცვლად, ქვეყნის უმდიდრეს ადამიანად ყოფილი პრემიერმინისტრი ბიძინა ივანიშვილი ითვლება".

ელინა ვალტონენი, საქართველოში 13 ოქტომბერს ჩამოვიდა და ოცნების ხელისუფლების საგარეო საქმეთა სამინისტროში გამართა შეხვედრა, შემდეგ კი რუსთაველის გამზირზე აქციის მონაწილეებთან მივიდა და საკუთარ სოციალურ ქსელში ვიდეო გამოაქვეყნა, სადაც პროტესტის მონაწილეებს მხარდაჭერა გამოუცხადა.

ვალტონენიმ X-ზე დაწერა:

"მშვიდობიანი მომიტინგეები შეიკრიბნენ პარლამენტის შენობის წინ, თბილისში, საქართველოში, რათა გამოეთქვათ თავიანთი შეშფოთება მათ ქვეყანაში არსებული რეპრესიების შესახებ. მათ აქვთ დემოკრატიისა და გამოხატვის თავისუფლების უფლება. ჩვენ აქ ვართ, რათა მხარი დავუჭიროთ მათ".

დღეს დილით, ოცნების ხელისუფლების მთავრობის ადმინისტრაციამ გაავრცელა ინფორმაცია, რომ პრემიერმინისტრმა, ირაკლი კობახიძემ ვალტონენისთან დაგეგმილი შეხვედრა გააუქმა, შემდეგ კი "ოცნების" წარმომადგენლებმა ერთი მეორეს მიყოლებით გააკრიტიკეს ვალტონენის რუსთაველის გამზირზე მიმდინარე აქციაზე გამოჩენა.

სამხრეთ კავკასიაში ვიზიტის ფარგლებში, ელინა ვალტონენი საქართველოში სომხეთიდან ჩამოვიდა და დღეს, 15 ოქტომბერს აზერბაიჯანში ჩავიდა.