“აი, ფაქტი" ბოლო ექვსი თვის განმავლობაში რუსული ორგანიზაცია “პრავფონდიდან” გამოჟონილ ფაილებს OCCRP-სა და მის პარტნიორ მედიებთან ერთად აანალიზებდნენ. ათასობით დოკუმენტსა და მეილში მათ იპოვეს მინიმუმ ოთხი ორგანიზაცია, რომლებიც რუსეთიდან ჯამში 800 000 ევრომდე დაფინანსებას იღებენ და საქართველოში პრორუსულ კამპანიებს ახორციელებენ.

როგორც “აი, ფაქტი” წერს, მარია და იულია არხიპოვებმა "პრავფონდს" 2023 წლის ზაფხულში მიმართეს, როცა აცხადებდნენ, რომ საქართველოში ეთნიკური ნიშნით იდევნებოდნენ. მათ დახმარება სწორედ ბაბუნაშვილის ორგანიზაციაზე გადაამისამართეს.

63 წლის მარინე ბაბუნაშვილი იურისტია, მოსკოვის სახელმწიფო უნივერსიტეტის კურსდამთავრებული. 1990-იან წლებში ის დაბრუნდა საქართველოში და მუშაობდა როგორც აკადემიურ, ისე საჯარო სექტორში, მათ შორის ედუარდ შევარდნაძის ადმინისტრაციაში. მოგვიანებით, 2008 წლის ომის შემდეგ, ბაბუნაშვილი იურიდიულ კონსულტაციებს უწევდა რუსეთის ინტერესთა სექციას თბილისში.

2005-2013 წლებში ბაბუნაშვილმა საქართველოში ოთხი ორგანიზაცია დააფუძნა, რომლებიც ფორმალურად ადამიანის უფლებებისა და სამოქალაქო სექტორის განვითარებაზე მუშაობენ. თუმცა, "აი, ფაქტის" მიერ გაანალიზებული ფაილების მიხედვით, ისინი “პრავფონდიდან” ფინანსდებიან და რუსულენოვანი მოსახლეობის უფლებების დაცვის საფარქვეშ პრო-რუსულ აქტივობებს ეწევიან.

რუსეთის საგარეო საქმეთა სამინისტრო ბაბუნაშვილს ოფიციალურ სიებში მოიხსენიებს, როგორც საქართველოში მოქმედ იურისტს, რომელიც თანამემამულეებს ეხმარება. მისი ორგანიზაციები რუსეთის ინტერესთა სექციის დოკუმენტებშიცაა ნახსენები როგორც "უფლებადამცველთა ქსელის მნიშვნელოვანი ნაწილი".

ინფორმაციის სრულად სანახავად იხილეთ "აი ფაქტის" სტატია.