ლედი გაგა კინოსამყაროს უბრუნდება — ამერიკელი პოპვარსკვლავი საკულტოდ ქცეული ფილმის, ეშმაკს აცვია პრადას, გაგრძელებაში მიიღებს მონაწილეობას. მუსიკოსი ამჟამად მორიგ ტურნეშია, თუმცა, გადატვირთული გრაფიკის მიუხედავად, ლონდონში ანშლაგით ჩავლილი კონცერტების გამართვის შემდეგ, იგი მილანში ჩავიდა, სადაც ფილმის გადაღებები მიმდინარეობს.

გაგამ ცოტა ხნის წინ ეპიზოდური როლი შეასრულა ნეტფლიქსის სერიალში Wednesday, მაგრამ ეშმაკს აცვია პრადა 2 მისთვის დიდ ეკრანზე დაბრუნებაა; ოსკაროსანმა მომღერალმა და მსახიობმა ბოლო კინოროლი გასულ წელს გამოსულ Joker: Folie à Deux-ში ითამაშა.

ამდენად, ეშმაკს აცვია პრადა 2-ის ვარსკვლავურ სამსახიობო გუნდს კიდევ ერთი ვარსკვლავი შეემატა. შეგახსენებთ, რომ გაგრძელებაში ჩვენთვის ნაცნობ და საყვარელ სახეებს ისევ შევხვდებით: ანდრეა საქსს ენ ჰეთეუეი ასრულებს, ემილი კვლავაც ემილი ბლანტია, ლეგენდარული მირანდა პრისლი კი, სხვა ვინ იქნებოდა, თუ არა კიდევ უფრო ლეგენდარული მერილ სტრიპი. გაგას მსგავსად, ფილმში არაერთ ახალ მსახიობსაც ვიხილავთ. თუმცა, უცვლელია ფილმზე მომუშავე გუნდიც: ეშმაკს აცვია პრადა 2 მისი წინამორბედის რეჟისორის, სცენარისტისა და პროდიუსერის ხელშია.

ეშმაკს აცვია პრადა, რომელიც 2006 წელს გამოვიდა ეკრანებზე, ლორენ ვაისბერგერის ამავე სახელწოდების რომანს ეფუძნება. ვაისბერგერი მცირე ხნით ამერიკული Vogue-ის რედაქტორის, ანა ვინტურის, პირადი ასისტენტი იყო და, გავრცელებული მოსაზრებით, სწორედ მის გამოცდილებას ეყრდნობა წიგნი. ამბის მთავარი პერსონაჟი ანდრეა საქსია, რომელიც მოდის ჟურნალ Runway-ში იწყებს მუშაობას და მისი მკაცრი, პრეტენზიული მთავარი რედაქტორის ასისტენტი ხდება.

ქვემოთ სპოილერია წიგნიდან და ფილმიდან!

ეშმაკს აცვია პრადა 2-ის სიუჟეტის დეტალებიც უკვე მეტ-ნაკლებად ცნობილია. საყოველთაო მედიაკრიზისის ფონზე, მირანდა პრისლი ჟურნალის გადარჩენას ცდილობს. თუმცა, ამისთვის საჭირო სახსრების მოსაძიებლად, არც მეტი, არც ნაკლები, თავის ყოფილ ასისტენტთან, ემილისთან, დაკავშირება სჭირდება, რომელიც ახლა უკვე მაღალი რანგის მენეჯერია სარეკლამო კომპანიაში. ჯერჯერობით არ ვიცით, სადაა და რას საქმიანობს ამბის მთავარი გმირი, ენდი, რომელიც პირველი ფილმის მიწურულს, Runway-ს ტოვებს და ერთ-ერთ გაზეთში იწყებს მუშაობას.

ეშმაკს აცვია პრადა 2-ს 2026 წლის 1-ელ მაისს, პირველი ფილმის გამოსვლიდან 20 წლისთავზე, ვიხილავთ.

ასევე იხილეთ: