ბრიტანეთმა, ჟენევაში, გაეროს ადამიანის უფლებათა საბჭოს სესიაზე, კიდევ ერთხელ დაადასტურა თავისი მხარდაჭერა საქართველოს სუვერენიტეტისადმი და მკაფიოდ მიუთითა რუსეთის მიერ საქართველოს ტერიტორიის ოკუპაციაზე. ამის შესახებ ინფორმაცია ბრიტანეთის მთავრობის ოფიციალურ გვერდზეა განთავსებული.

"გაერთიანებულმა სამეფომ ჟენევაში გამართულ გაეროს ადამიანის უფლებათა საბჭოს სესიაზე კიდევ ერთხელ დაადასტურა თავისი მხარდაჭერა საქართველოს სუვერენიტეტისადმი.
ბრიტანეთი კვლავაც მტკიცედ უჭერს მხარს გაეროს ადამიანის უფლებათა საბჭოს რეზოლუციას 60/16 — "თანამშრომლობა საქართველოსთან".

რეზოლუცია ხაზს უსვამს ადამიანის უფლებების დარღვევებსა და ჰუმანიტარულ პრობლემებს, რომლებიც რუსეთის მიერ საქართველოს ტერიტორიების ოკუპაციის გაგრძელებას მოჰყვა", — წერია გავრცელებულ ინფორმაციაში.

სახელმწიფო მინისტრმა სტივენ დაუთიმ განაცხადა, რომ რუსეთმა თავისი სამხედრო ძალები უნდა გაიყვანოს და გააუქმოს ეგრეთწოდებული "დამოუკიდებელი რეგიონების" აღიარება.

"უკვე 17 წელია, რაც რუსეთის უკანონო სამხედრო კონტროლი აფხაზეთსა და სამხრეთ ოსეთზე არღვევს საერთაშორისო სამართალს და ეთნიკურ ქართველებს უმძიმესად უზღუდავს მათ ფუნდამენტურ უფლებებს. ამ ოკუპაციას აუცილებლად უნდა დაესვას წერტილი.

რუსეთმა უნდა გაიყვანოს თავისი სამხედრო ძალები, გააუქმოს ამ ეგრეთწოდებული "დამოუკიდებელი რეგიონების" აღიარება და საერთაშორისო დამკვირვებლებს მისცეს შესაძლებლობა შევიდნენ ოკუპირებულ ტერიტორიებზე. ყოველი იძულებით გადაადგილებული პირი — ეთნიკური კუთვნილების მიუხედავად — იმსახურებს უსაფრთხოდ, ღირსეულად და მშვიდობიანად დაბრუნებას საკუთარ სახლში", — თქვა დაუთიმ.