სომხეთში რუსეთის ფედერაციის მიერ გამოცხადებული ძებნის გამო დაკავებული ქართველი მებრძოლი გიორგი კინოიანი თავისუფალია. სომხეთმა მის რუსეთში ექსტრადიციაზე უარი თქვა. ამის შესახებ ინფორმაციას სამოქალაქო აქტივისტი, საქართველოს სომხური სათემო პლატფორმის თავმჯდომარე, გიორგი ტუმასიანი ავრცელებს. მისი თქმით, იგივე გადაწყვეტილებას ელიან ვანო საბაშვილის შემთხვევაშიც.

"გიორგი კინოიანი თავისუფალია! სომხეთმა მის ექსტრადიციაზე რუსეთში უარი თქვა, რადგან "ეს მისთვის საფრთხის შემცველი იქნებოდა".

დიდი მადლობა სომხეთის ხელისუფლებას და გამორჩეულ უფლებადამცველებს, Helsinki Citizens’ Assembly-Vanadzor-ს, Artur Sakunts-ს და Ani Chatinyan-ს.

მოველით, რომ იგივე გადაწყვეტილება იქნება მიღებული სომხეთში რუსეთის მოთხოვნით დაკავებული მეორე ქართველის, ვანო საბაშვილის შეხვევაშიც," — დაწერა ტუმასიანმა.

ცნობისთვის, უკრაინის ომის მონაწილე ქართველი მებრძოლი, გიორგი კინოიანი სომხეთში 8 სექტემბერს დააკავეს. მას რუსეთში ექსტრადიცია ემუქრებოდა.

შეგახსენებთ, გიორგი კინოიანი რუსეთის წინააღმდეგ უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს ის რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.