"საქართველომ უნდა უზრუნველყოს, რომ საკუთარი მოქალაქის ექსტრადირება რუსეთში არ განხორციელდეს" — ასე ეხმაურებიან საქართველოს ახალგაზრდა იურისტთა ასოციაციის თავმჯდომარევ ნონა ქურდოვანიძე და სოციალური სამართლიანობის ცენტრის ხელმძღვანელი თამთა მიქელაძე უკრაინაში მებრძოლი გიორგი კინოიანის დაკავებას, რომელსაც რუსეთში ექსტრადირება ემუქრება.

თამთა მიქელაძეს არ აქვს მოლოდინი, რომ ქართული ოცნება საქართველოსთვის გიორგი კინოიანის გადმოცემისთვის "ძალისხმევას გაწევს" იმ ფონზე, როცა მისი რიტორიკა "მკვეთრად ანტიუკრაინულია".

"თანამშრომლობის ფარგლებში მისი მოქალაქის საქართველოში მიღების ადვოკატირება საქართველოს ხელისუფლებას შეუძლია. ნამდვილად არის შესაძლებელი სამართლიანი სასამართლოს პირობებში და თუნდაც სტრასბურგის მექანიზმით გაჩერება ექსტრადიციის პროცესის. თუ ის დაიწყება რადგან ჩვენთვის კარგად არის ცნობილი რუსეთში ციხეებში არსებული მდგომარეობა. ეს ადამიანები ტყვედ ჩავარდნის თუ დაპატიმრების შემდეგ ხვდებიან ძალიან მძიმე წამების, არაადამიანური მოპყრობის მსხვერპლები. მოლოდინი რომ ამ შემთხვევაში ქართული ოცნება მნიშვნელოვან ძალისხმევას გაწევს ამ ადამიანის საქართველოსთვის გადმოსაცემად არ მაქვს იმ ფონზე, როცა მისი რიტორიკა მკვეთრად ანტიუკრაინულია და ის საერთოდ მტრულად ხედავს უკრაინაში მებრძოლ ქართველებსაც კი," — განაცხადა თამთა მიქელაძემ "ტვ პირველის" ეთერში.

ნონა ქურდოვანიძის განცხადებით, საქართველო ვალდებულია საკუთარი მოქალაქეები დაიცვას მიუხედავად იმისა სად იმყოფებიან ისინი.

"საქართველო არის ვალდებული, რომ საკუთარი მოქალაქეები დაიცვას მიუხედავად იმისა სად იმყოფებიან ისინი და რომელი სახელმწიფოს მოთხოვნით არიან დაკავებულები და ითხოვს თუ არა კონკრეტულად ეს სახელმწიფო მის ექსტრადირებას. ეს ნიშნავს იმას რომ ახლა, როდესაც ცნობილი არის, რომ რუსეთის მხრიდან იქნება მოთხოვნა საქართველოს მოქალაქის ექსტრადირებასთან დაკავშირებით, საქართველო აქტიურად უნდა ჩაერთოს ამ საქმეში და უნდა უზრუნველყოს, რომ საქართველოს მოქალაქის ექსტრადირება არ განხორციელდეს რუსეთში, რადგან საზოგადოებისთვის კარგად არის ცნობილი რუსეთში როგორ ეპყრობიან იმ ადამიანებს, ვისაც ბრალს სდებენ უკრაინაში ომში მონაწილეობაზე რუსეთის წინააღმდეგ ქმედებებში და შესაბამისად ასეთ დროს საქართველო ვალდებული არის, რომ საქართველოს მოქალაქის ინტერესები და უფლებები დაიცვას," — განაცხადა ნონა ქურდოვანიძემ "ტვ პირველის" ეთერში.

უკრაინის ომის მონაწილე ქართველი მებრძოლი, გიორგი კინოიანი სომხეთში დააკავეს და მას რუსეთში ექსტრადიცია ემუქრება. ქართველი მებრძოლი 40-დღიანი საექსტრადიციო ვადითაა დაკავებული. რუსეთმა ამ დროში საჭირო მტკიცებულებები და დოკუმენტაცია უნდა წარადგინოს, ხოლო შემდეგ სომხეთის სასამართლო მიიღებს გადაწყვეტილებას — გადასცემს თუ არა ქართველ მებრძოლს რუსეთს.

ცნობისთვის, გიორგი კინოიანი რუსეთის წინააღმდეგ უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს ის რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.