უკრაინის ომის მონაწილე ქართველი მებრძოლი, გიორგი კინოიანი სომხეთში დააკავეს და მას რუსეთში ექსტრადიცია ემუქრება. ამის შესახებ დაკავებულის ძმა "ტვ პირველთან" აცხადებს.

ქართველი მებრძოლი 40-დღიანი საექსტრადიციო ვადითაა დაკავებული. რუსეთმა ამ დროში საჭირო მტკიცებულებები და დოკუმენტაცია უნდა წარადგინოს, ხოლო შემდეგ სომხეთის სასამართლო მიიღებს გადაწყვეტილებას — გადასცემს თუ არა ქართველ მებრძოლს რუსეთს.

ქართველმა მესაზღვრეებმა მებრძოლი საზღვარზე ისე გაუშვეს, არ მიაწოდეს ინფორმაცია იმის შესახებ, რომ რუსეთის მიერ წითელი ცირკულარით იყო ძებნილი. ოჯახის თქმით, თუ მას საქმის კურსში ჩააყენებდნენ, კინოიანი საქართველოს არ დატოვებდა. ამის შესახებ "ტვ პირველთან" დაპატიმრებული მებრძოლის ძმა და მეგობრები საუბრობენ.

"დონეცკის ე.წ. სასამართლომ, ჩემ ძმას 2024 წლის ოქტომბერში დაუსწრებლად გამოუტანა განაჩენი და რუსეთმა წითელი ცირკულარით მოითხოვა ამ ძებნილების გადაცემა. არ ვიცი რა იქნება, სომეხი ადვოკატები იმედს არ გვაძლევენ, ამბობენ, რომ ექსტრადიციის საფრთხე ძალიან დიდია. საზღვრის კვეთის დროს მას არანაირი ინფორმაცია არ ჰქონდა, რომ დააკავებდნენ და რაიმე პრობლემები შეექმნებოდა, თორემ ლოგიკურია, რომ ამ გადაწყვეტილებას არ მიიღებდა. სომხეთის საზღვარზე, მესაზღვრეებს ამოუგდო რომ რუსეთის მხრიდან წითელი ცირკულარით იძებნებოდა, ამის შესახებ არც გიორგის და არც მის ირგვლივ არავის არ ჰქონია. სომხეთში, საქართველოს საელჩოშიც ვიყავი, მაგრამ ამ ეტაპზე არანაირი გამოხმაურება არ გვაქვს. მითხრეს, რომ ინფორმაცია აქვთ, შესაბამისი სტრუქტურები მუშაობენ, თუმცა, ჩემთან ხაზზე არავინ გამოსულა, არც ოჯახის სხვა წევრებთან. დღეს ვაპირებ მივმართოთ იუსტიციის სამინისტროს, საგარეო საქმეთა სამინისტროს და ყველა იმ სტრუქტურას, რომელიც შესაძლოა, ჩვენ გამოგვადგეს", — განაცხადა კინოიანის ძმამ.

კინონიანის მეგობრები ამბობენ, რომ ადვოკატები საიმედოს არაფერს ამბობენ და სავარაუდო ექსტრადიციაზე საუბრობენ.

"მიდიოდა სასომხეთში, პასპორტი როგორც კი მიაწოდა, მაშინვე დააკავეს, 3 დღე მიუსაჯეს, 6 -ში კი მიუსაჯეს 40-დღიანი, წინასწარი საექსტრადიციო პატიმრობა. იქაური ადვოკატები რასაც გვეუბნებიან, ალბათ, ექსტრადიცია, 90 %. საიმედო არაფერი გვითხრეს, სავარაუდო ექსტრადიციაზე გვესაუბრებიან. თუ ვინმე არ ჩაერთვება აქედან", — ამბობს მეგობარი.

კინოიანის თანამებრძოლები ამბობენ, რომ მისი რუსეთში ექსტრადირება სარისკოა და დიდ საფრთხესთან არის დაკავშირებული.

"ოკუპირებული დონეცკის ოლქის ე.წ. სასამართლომ რამდენიმე ქართველს დაუსწრებლად მოგვისაჯა პატიმრობა და ჩვენზე გამოცხადდა ძებნა, სხვადასხვა ქვეყნებში. მას ემუქრება სერიოზული საფრთხე რუსეთში ექსტრადირებისა და ალბათ მოგეხსენებათ, რამდენად საშიში და სარისკოა და ასევე, რა შეიძლება მოხდეს მისი რუსეთში ექსტრადირების შემთხვევაში. ოჯახმა ყველაფერი გააკეთა, მიმართეს ყველას, ასევე იყვნენ მისულები სახალხო დამცველთან, მაგრამ ჯერჯერობით, არანაირი იმედი არ ჩანს, ერთადერთი საშუალება გვრჩება, რაც შეიძლება მეტ ადამიანს მივაწვდინოთ ხმა, ვუთხრათ მთავრობას, რადგან ასეთ შემთხვევაში, მათ აქვთ მთავარი ძალა", — ამბობს დომენიკ მანგო.

ცნობისთვის, გიორგი კინოიანი რუსეთის წინააღმდეგ უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს ის რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.