სომხეთში დაკავებული ქართველი მებრძოლის, გიორგი კინოიანის შესახებ მოძრაობა ერთობის ერთ-ერთი ლიდერი გიორგი ტუმასიანი დამატებით დეტალებს სოციალურ ქსელში წერს. მისი თქმით, კინოიანი სომხეთში, ქალაქ ვანაძორში წინასწარი დაკავების იზოლატორში იმყოფება. მისივე თქმით, ქართველი მებრძოლის "რუსეთში ექსტრადიცია პრაქტიკულად გამორიცხულია".

"გიორგი კინოიანის საკითხზე:

იმყოფება სომხეთში, ქალაქ ვანაძორში, წინასწარი დაკავების იზოლატორში. ვესაუბრე სომხეთში შესაბამის უფლებადამცველ ორგანიზაციებს, გიორგი კინოიანის ოჯახის წევრებთანაც კომუნიკაციაში ვარ და მათ შორის კომუნიკაციასაც ვუწყობ ხელს. ხვალამდე ოჯახის წევრები უფლებადამცველებს მისცემენ სპეციალურ ნებართვას გიორგი კინოიანის ინტერესების დაცვაზე და უფლებადამცველები შევლენ გიორგისთან, დაიწყებენ მისი უფლებების დაცვას, რათა მალე მოხდეს მისი გათავისუფლება, რუსეთში ექსტრადიცია პრაქტიკულად გამორიცხულია.

გიორგი კინოანი დაკავებულია რუსეთის მოთხოვნით, საერთაშორისო ძებნით. სომხეთი იძულებულია მაგაზე რეაგირება მოახდინოს, დააკავოს პიროვნება და შემდეგ გაარკვიოს რის საფუძველზეა ძებნა. ეს გათვალისწინებულია დსთ-ს ფარგლებში და ორმხრივი შეთანხმებებით.
რადგან ეს ძებნა ე.წ. დონეცკის რესპუბლიკის სასამართლოს განჩინებით გამოაცხადა რუსეთმა, სომხეთი, როგორც წესი, ამას უარყოფს რადგან არ არის აღიარებული რუსეთის ნაწილად ეს ტერიტორია და შემდეგ ადამიანის გათავისუფლება ხდება. ამოწმებენ ასევე ხომ არ აქვს ამ ადამიანს რუსეთის ტერიტორიაზე ჩადენილი დანაშაული, ეს არის წესიდან გამონაკლისი შემთხვევები.

ასევე, გეტყვით რომ საქმის კურსში ჩავაყენე სომხეთის პოლიტიკური ხელისუფლებაც, რათა ამ საკითხისადმი იყვნენ ყურადღებით. ჩვენი მოქალაქეა და საქართველოს ინტერესი უნდა გაითვალისწინონ.

წესით, ამას მე არ უნდა ვაკეთებდე, საელჩო გვაქვს სომხეთში, ჩვენი გადასახადებიდან ხელფასებს ვუხდით. აი საკუთარი მთავრობის იმედად რომ არ ვართ, ეგაა ტრაგიკული და შესაცვლელი", — დაწერა გიორგი ტუმასიანმა.

ცნობისთვის, გიორგი კინოიანი რუსეთის წინააღმდეგ უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს ის რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.

ქართველი მებრძოლი 40-დღიანი საექსტრადიციო ვადითაა დაკავებული. რუსეთმა ამ დროში საჭირო მტკიცებულებები და დოკუმენტაცია უნდა წარადგინოს, ხოლო შემდეგ სომხეთის სასამართლო მიიღებს გადაწყვეტილებას — გადასცემს თუ არა ქართველ მებრძოლს რუსეთს.