ქართველი მოხალისე ვანო საბაშვილს, რომელიც უკრაინაში რუსეთის არმიის წინააღმდეგ იბრძოდა, სომხეთიდან რუსეთში ექსტრადიციას ემუქრება. ამის შესახებ apsny.ge და European Pravda იტყობინება.

დაკავებულის მეგობრების თქმით, საბაშვილმა არ იცოდა, რომ ის რუსეთის საერთაშორისო ძებნილთა სიაში იყო.მან საქართველოს საზღვარი ინციდენტების გარეშე გადაკვეთა, თუმცა სომხეთის მხარეს დააკავეს. მისი დაკავება 9 სექტემბერს მოხდა, როდესაც სომხეთში სამუშაოდ იმყოფებოდა.

საბაშვილი რვა წლის განმავლობაში მსახურობდა საქართველოს შეიარაღებულ ძალებში. ის საერთაშორისო ლეგიონში იბრძოდა რუსეთისა და უკრაინის ომის დროს. კონტრაქტის დასრულების შემდეგ, სამშობლოში დაბრუნდა.

მოგვიანებით, ე.წ. დონეცკის სახალხო რესპუბლიკის სასამართლომ, უკრაინის მხარეს საბრძოლო მოქმედებებში მონაწილეობისთვის, მას დაუსწრებლად პატიმრობა მიუსაჯა.

შეგახსენებთ, რომ მსგავსი ინციდენტი სექტემბერშიც მოხდა, როდესაც საქართველოს მოქალაქე გიორგი კინოიანი, რომელიც უკრაინაში იბრძოდა, სომხეთის საზღვარზე დააკავეს.