კახა კალაძის განცხადებით, 4 ოქტომბრის აქციასთან დაკავშირებით პასუხი მოეთხოვებათ იმ ოპოზიციონერ პოლიტიკოსებს, რომელიც მომხდარს გაემიჯნენ. კალაძის განმარტებით, "ყველაფერი დაფიქსირებულია — ვინ რა განცხადებებიც არ უნდა აკეთოს, ეს ერთი ძალადობრივი დაჯგუფებაა".

"არ გამოუვათ იმიტომ, რომ ყველაფერი დაფიქსირებულია, ყველაფერი ინახება — მათი განცხადებები, კონკრეტული ქმედებები. შესაბამისად, ვინ რა განცხადებებიც არ უნდა აკეთოს, ეს ერთი ძალადობრივი დაჯგუფებაა, რომელსაც შეიძლება სხვადასხვა სახელი ერქვას, მაგრამ ერთი პატრონი ჰყავს, ასრულებს ერთ დავალებას, სხვადასხვა ფორმით. ჩვენ ვაფრთხილებდით, ვერავინ იტყვის, რომ არ გაგვიფრთხილებია. რაც არ უნდა იყოს, ჩვენი მოქალაქეები არიან, კარგია თუ ცუდია, ამ ქვეყანაში ცხოვრობენ. შესაბამისად, ჩვენ, როგორც ხელისუფალი, ვაფრთხილებდით წინა დღეების განმავლობაში, რომ ვინმემ არ გაბედოს კანონსაწინააღმდეგო ნაბიჯების გადადგმა. ვიღაცებმა გადადგეს? ამას მოჰყვება შესაბამისი რეაგირება," — თქვა კალაძემ.