"ლელო -ძლიერი საქართველოსა" და "გახარია საქართველოსთვის" თბილისის მერობის საერთო კანდიდატმა, ირაკლი კუპრაძემ, არჩევნებზე საკუთარი ხმა დააფიქსირა. ჟურნალისტებთან მან განაცხადა, რომ კორუფციისგან, უსამართლობისგან, პოლიტიკური პატიმრებისგან, უკანონობისგან ქალაქისა თუ ქვეყნის გასათავისუფლებლად მოქალაქეები არჩევნებზე უნდა მივიდნენ.

"თუ არ გინდათ წარსული, თუ გინდათ დედაქალაქის გათავისუფლება კორუფციისგან, უსამართლობისგან, ეს ქალაქი და ქვეყანა პოლიტიკური პატიმრების გარეშე, კორუფციის, უსამართლობის, უკანონობის, არაკომპეტენტურობის გარეშე, აუცილებლად უნდა მიხვიდეთ თქვენს საარჩევნო უბნებზე და მისცეთ ხმა საქართველოს მომავალს, არა წარსულს, არამედ მომავალს. მარტივი ფორმულირებაა, რომ თქვენი დედაქალაქის, თბილისისა და მთელი საქართველოს ბედს წყვეტთ მხოლოდ და მხოლოდ თქვენ. იმედიანად, მშვიდობიანად, ამისთვის საჭიროა, მხოლოდ და მხოლოდ, მიხვიდეთ საარჩევნო უბნებზე და გამოხატოთ თქვენი მხარდაჭერა, აზრი იმ პოლიტიკური პარტიის მიმართ, გუნდებისა და კანდიდატების მიმართ, რომლებიც საუბრობენ მომავალზე. კი არ კინკლაობენ, არამედ აქვთ კონკრეტული გეგმა, რომლითაც შეიძლება მხარი დაუჭირონ მოქალაქეებს, აღმოვფხვრათ ის სიღარიბე, უსამართლობა და კორუფცია, რაც ჩვენ გარშემო არის გამეფებული", — თქვა მან.

ირაკლი კუპრაძემ განაცხადა, რომ საარჩევნო დარღვევებისა თუ მანიპულაციებისგან თავდაცვის საშუალებაც სწორედ არჩევნებზე მაღალი აქტივობაა.

"რაც შეეხება გამოვლენილ დარღვევებს, საარჩევნო მანიპულაციის, ზეწოლის, ძალადობის დაცვის საუკეთესო საშუალებაა მაღალი აქტივობა. რაც შეიძლება მეტი ადამიანი უნდა მივიდეს საარჩევნო უბანზე და ეს არის სწორედ იმის გარანტია, რომ საარჩევნო უბნებზე მანიპულაციას შესაძლებლობა იქნება ბევრად მცირე „ქართული ოცნების“ მხრიდან, ვიდრე იმ შემთხვევაში, თუ ამომრჩევლები არ მივლენ საარჩევნო უბნებზე. მთავარია მიხვიდეთ საარჩევნო უბნებზე, დააფიქსიროთ თქვენი ხმა და მოსაზრება, ეს იქნება მთავარი დაზღვევა გაყალბების, მანიპულაციის, ზეწოლისა და ძალადობის წინააღმდეგ.

დღევანდელი დღის პროგნოზს წყვეტენ მხოლოდ და მხოლოდ, თბილისელები და ის ადამიანები, რომლებმაც უნდა მიიღონ გადაწყვეტილება საკუთარი ქალაქის ბედზე. მათი აქტივობა, მათი შრომა, ბრძოლისუნარიანობა იქნება მხოლოდ და მხოლოდ განმსაზღვრელი დღევანდელი დღის. მე დარწმუნებული ვარ, თბილისი, ისე როგორც ყოველთვის, იქნება ცვლილებების ავანგარდში, იქნება ავანგარდში საკუთარი უფლებების დაცვის და ეროვნული ინტერესების დაცვის", — განაცხადა მერობის კანდიდატმა.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ".