თიბისის მხარდაჭერით დიზაინის ინსტიტუტი სკოლის დამამთავრებელი კლასების მოსწავლეებსა და სტუდენტებს ინტენსიურ გრძელვადიან პროგრამებს სთავაზობს: დიზაინის საფუძვლების, შემოქმედებითი და ვიზუალური ფიქრის მიმართულებით.

პროგრამები ეხმარება სტუდენტებს პროფესიული ინტერესების პოვნაში, აკადემიური საფუძვლის შექმნაში და საკუთარი შემოქმედებითი პოტენციალის აღმოჩენაში.

შემოდგომის სემესტრში ინსტიტუტი საფუძვლების პროგრამის მეოთხე ნაკადს მიიღებს და, ამჯერად, დიზაინის საფუძვლების გარდა, სტუდენტებს შემოქმედებითი და ვიზუალური ფიქრის გრძელვადიან პროგრამასაც შესთავაზებს. სტუდენტებს შეეძლებათ, აირჩიონ ის მიმართულება, რომელიც მათ პროფესიულ და აკადემიურ ინტერესებს მეტად ერგება.

თითოეული პროგრამა აერთიანებს 30-ზე მეტ ლექტორსა და დიზაინის, შემოქმედებითი და ბიზნეს სფეროს პროფესიონალს. ინტენსიური, 200 საათიანი კურსის განმავლობაში, სტუდენტებს შეეძლებათ, სრულყოფილად გაიცნონ დიზაინის სფეროსა და შემოქმედებით ინდუსტრიაში არსებული პროფესიები და დისციპლინების საფუძველი, იმუშავონ დარგის საუკეთესო სპეციალისტებთან ნამდვილ პროექტებზე, გაიზიარონ ცოდნა და მიიღონ რჩევები ბიზნესისა და სოციალური სექტორის წარმომადგენლებისგან.

პარტნიორების მხარდაჭერით, ინსტიტუტმა წელსაც გასცა გრძელვადიან პროგრამებზე რამდენიმე სრული (100%) სტიპენდია.

თიბისი მხარს უჭერს განათლების ისეთ პროექტებს, რომლებიც ადამიანების განვითარებასა და მათ წინსვლას უწყობს ხელს. ბრენდის მიზანია, წაახალისოს და დაეხმაროს ადამიანებს, რომლებსაც სჯერათ, რომ განათლებით საკუთარ ამბავს ქმნიან.