საქართველოს საპარლამენტო უმრავლესობის წევრი, მამუკა მდინარაძე ამბობს, რომ ყველა, მათ შორის პრეზიდენტი თანხმდება, რომ კონსტიტუციაში ვეტო უნდა დაედოს ბონუსების სისტემას და ბლოკების საკითხს. მდინარაძემ ამ საკითხზე პრეზიდენტთან შეხვედრის შემდეგ განაცხადა.

"პრეზიდენტს დღეს საბოლოო გადაწყვეტილება არ გაუხმოვანებია, თუმცა ძალიან კარგია, რომ ყველანი ვთანხმდებით პრეზიდენტი, ჩვენ, ჩვენ ვიცით, რომ ამაზე თანხმობას აცხადებს ოპოზიციაც და არასამთავრობო სექტორიც, რომ ეს არის ის ორი საკითხი, რომელთან დაკავშირებითაც სადავო საკითხები არ არსებობს. ამას ეთანხმება ვენეციის კომისიაც, ანუ ამასთან დაკავშირებით არსებობს კონსენსუსიც", - განაცხადა მდინარაძემ.

საქართველოს საპარლამენტო უმრავლესობის წარმომადგენლები საქართველოს პრეზიდენტს თითქმის ორი საათის განმავლობაში ხვდებოდნენ.

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები.

კონსტიტუციის პროექტის საბოლოო ვერსიაზე პრეზიდენტმა დადგენილ ათი დღის ვადაში უნდა მიიღოს გადაწყვეტილება, დაადებს თუ არა ვეტოს ქვეყნის მთავარ კანონს, თუ მის ცალკეულ ნაწილებს.

პარლამენტის თავმჯდომარემ, ირაკლი კობახიძემ, კონსტიტუციის მიღების შემდეგ, პრეზიდენტს შესთავაზა, რომ ვეტოს უფლება მხოლოდ ბონუსის სისტემის გაუქმებისა და ბლოკების ერთჯერადად შენარჩუნების ნაწილში გამოიყენოს. მისივე თქმით, ამით, პრეზიდენტს შეუძლია, საკონსტიტუციო ცვლილებების ექვსთვიან პროცესში პირველად ითამაშოს "კონსტრუქციული" როლი.

გიორგი მარგველაშვილმა მმართველ პარტიასა და იმ პოლიტიკურ ძალებს, რომლებიც ჩართულები იყვნენ საკონსტიტუციო პროცესში, პრეზიდენტის სასახლეში კონსულტაციების გამართვა შესთავაზა. შეხვედრას არ დაესწრო მმართველი პარტია, რადგან, პარლამენტის თავმჯდომარის თქმით, ამ საკითხების გარშემო უნდა მოეწყოს ისინი ცალკე უნდა შეხვდნენ ერთმანეთს.