"თუ თქვენ ჩაიდენთ დანაშაულს და ამაში დედა დაგეხმარებათ, შესაბამისად, პროკურატურას ექნება საფუძველი, რომ გამოძიება დაიწყოს ორივეს მიმართ", — ამის შესახებ ოცნების ხელისუფლების იუსტიციის მინისტრმა, პაატა სალიან გიორგი ბაჩიაშვილის მშობლებზე სისხლის სამართლებრივი დევნის დაწყებასთან დაკავშირებით დასმული კითხვის საპასუხოდ განაცხადა. მისი თქმით, "ქართული ოცნება არავის დევნის და ამას ხალხი ხედავს".

"ძალიან მარტივად გეტყვით, თუ თქვენ ჩაიდენთ დანაშაულს და ამაში დედა დაგეხმარებათ, შესაბამისად პროკურატურას ექნება საფუძველი, რომ გამოძიება დაიწყოს ორივეს მიმართ. სავარაუდოდ აქაც ამასთან გვაქვს ადგილი. მე ვერ გეტყვით ახლა წინასწარ, სანამ გამოძიება არ დასრულდება, სანამ არ ექნება სასამართლოს გამამტყუნებელი განაჩენი, მე უფლება არ მაქვს ვინმე დამნაშავედ გამოვაცხადო. მაგრამ, როგორც ჩანს, პროკურატურამ დაინახა სისხლის სამართლის დანაშაულის ნიშნები და ამიტომ დაიწყო გამოძიება. რაც შეეხება თქვენს განმარტებას, რომ ქართული ოცნება ვინმეს დევნის, აბსურდია. ქართული ოცნება არავის დევნის და ამას ხალხი ხედავს. გიორგი ბაჩიაშვილის გამო ქვეყანაში კანონები არ შეცვლილა", — აცხადებს პაატა სალია.

შეგახსენებთ, პროკურატურამ პატიმრობაში მყოფი "თანაინვესტირების ფონდის" ყოფილი ხელმძღვანელის, გიორგი ბაჩიაშვილის მშობლების მიმართ სისხლისსამართლებრივი დევნა დაიწყო. მათ მიმართ საქმე აღიძრა სისხლის სამართლის კოდექსის 25, 194-ე მუხლის მე-3 ნაწილის "გ" ქვეპუნქტით გათვალისწინებული დანაშაულისათვის, რაც სასჯელის სახედ და ზომად 9-დან 12 წლამდე ვადით თავისუფლების აღკვეთას ითვალისწინებს.