ე.წ პიჯაკების საქმეზე სასამართლომ საქართველოს მესამე პრეზიდენტს, მიხეილ სააკაშვილს და სახელმწიფო დაცვის სპეციალური სამსახურის ყოფილ უფროსს, თეიმურაზ ჯანაშიას სახელმწიფოსთვის 9 მილიონი ლარის გადახდა დააკისრა — გადაწყვეტილება მოსამართლე ალექსანდრე გზირიშვილმა მიიღო.

სააკაშვილის ადვოკატის, ბექა ბასილაიას განცხადებით, მისი დაცვის ქვეშ მყოფის წინააღმდეგ წაყენებული ბრალდებები აბსურდულია და არ არის დასაბუთებული.

"პრეზიდენტობის დროს მიხეილ სააკაშვილმა პიჯაკები რომ შეიძინა, ეს ფული აგვინაზღაურეთო. მაგალითად, სააკაშვილი დონალდ ტრამპს რომ გაუმასპინძლდა აქ სტუმრობის დროს, ეგ თანხა აგვინაზღაურეთო; მაგალითად, ვაცლავ ჰაველის საფლავზე რომ თაიგული მიიტანეს, ამის ფული აგვინაზღაურეთ საკუთარი ჯიბიდანო; მასზე ფინანსური დევნაც დაიწყეს. უნდათ, რომ მიხეილ სააკაშვილი მოვალეთა რეესტრში ჩასვან.

ფინანსთა სამინისტროს სარჩელს ბევრი წინაპირობა ჰქონდა, რის გამოც არ უნდა განხილულიყო — არასათანადო მოსარჩელე, ხანდაზმულობა," — თქვა მიხეილ სააკაშვილის ადვოკატმა, ბექა ბასილაიამ ფორმულასთან.

ცნობისთვის, 12 მარტს ე.წ პიჯაკების საქმეზე სასამართლომ მიხეილ სააკაშვილს 9 წლით პატიმრობა მიესაჯა, ხოლო თეიმურაზ ჯანაშიას — 300 000 ლარიანი ჯარიმა.

მიუხედავად საქალაქო სასამართლოს ამ გადაწყვეტილებისა, ფინანსთა სამინისტრომ სამოქალაქო დავა დაიწყო და ზარალის ამოღების მიზნით სასამართლოს კიდევ ერთხელ მიმართა.