ლელოს მაჟორიტარობის კანდიდატებმა კიდევ 3 რეგიონში თქვეს უარი არჩევნებში მონაწილეობაზე და კანდიდატურები ქართული ოცნების კანდიდატების სასარგებლოდ მოხსნეს. "ტვ პირველის" ცნობით, ესენი არიან: ყულარის, პირველი ქესალოსა და ყიზილაჯლოს მაჟორიტარობის კანდიდატები.

ლელოს და გახარიას პარტიის მერობის ერთობლივი კანდიდატის, ირაკლი კუპრაძის თქმით, კანდიდატურების მოხსნა "დაშინებით" მოხდა.

"დღეს კიდევ სამი მაჟორიტარი დააშინეს მთელი საქართველოს მასშტაბით და სამ მაჟორიტარს ათქმევინეს, რომ თურმე არანაირი ზეწოლა არ მიმდინარეობს და უარი თქვეს კანდიდატობაზე. კიდევ სამ მაჟორიტარს ათქმევინეს. მე ვსვამ შეკითხვას, თუ არ ეშინია ბიძინა ივანიშვილს და რუსულ რეჟიმს ჩვენი, რატომ აკეთებს ამას. პასუხი ნათელია – ეშინია, ეშინია ჩვენი ერთობის, ეშინია კოალიცია ძლიერი საქართველოსი, ეშინია გახარიას გუნდის და ეშინია იმ ბრძოლის, რომელიც ჩვენ გავუჩაღეთ მას მთელი საქართველოს მასშტაბით", — თქვა ირაკლი კუპრაძემ.

ცნობისათვის, 23 სექტემბერს ლელოს ბოლნისის მერობის კანდიდატმა, ასაფ ჩირაგოვმა კანდიდატურა ოცნების სასარგებლოდ მოხსნა. ჩირაგოვი აღნიშნავს, რომ "დარწმუნდა, რომ ქართული ოცნების კანდიდატი, ზამურ ჭითანავა, გამარჯვების შემდეგ მართლაც იზრუნებს ბოლნისის განვითარებასა და მუნიციპალიტეტის მოსახლეობის ინტერესების დაცვაზე

ამის შემდეგ ირაკლი კუპრაძემ განაცხადა, რომ "ლელოს" ბოლნისის მერობის კანდიდატურა ოცნებამ მუქარით გადმოიბირა.

იმავე დღეს "ლელოს" ჩირაგოვმა განაცხადა, რომ მან "ოცნებას" კანდიდატურა თავისი ნებით დაუთმო და ირაკლი კუპრაძის ვერსიას მის დაშინებასა და ზეწოლაზე სიმართლეს არ შეესაბამება.