ნაფიცმა მსაჯულებმა, ორი კვირიანი სასამართლო პროცესის შემდეგ, 23 სექტემბერს, დონალდ ტრამპის მკვლელობის მცდელობაში ბრალდებული რაიან რუთი დამნაშავედ ცნეს. ამის შესახებ ინფორმაციას Associated Press ავრცელებს.

გადაწყვეტილების გამოცხადების შემდეგ სასამართლო დარბაზში არეულობა მოხდა — რუთმა კალმით ყელზე თვითდაზიანების მიყენება სცადა, თუმცა ოფიცრებმა სწრაფადვე გაიყვანეს დარბაზიდან.

Associated Press-ის ცნობით, კალამი, რომელსაც რუთი იყენებდა, სპეციალურად მოქნილი დიზაინის იყო, რათა პატიმრობაში მყოფ პირებს იარაღად ვერ გამოეყენებინათ. AP-ის ანონიმური წყაროს თქმით, რუთმა საკუთარი თავისთვის ზიანის მიყენება ვერ შეძლო.

როდესაც დარბაზში წესრიგი აღდგა, რუთი ხელბორკილებით წარსდგა აშშ-ის ფედერალური მოსამართლის, აილენ ქანონის წინაშე.

რუთს განაჩენs 18 დეკემბერს გამოუტანენ. მას სამუდამო პატიმრობა ემუქრება.

ცნობისთვის, 2024 წლის საპრეზიდენტო კამპანიის პერიოდში დონალდ ტრამპზე ორი თავდასხმის მცდელობა მოხდა. პირველი შემთხვევა 13 ივლისს პენსილვანიაში, ბატლერში, სადაც ტრამპი მხარდამჭერებს მიმართავდა — ტყვიამ მას მარჯვენა ყურის ზედა ნაწილი გაუსერა. 20 წლის თავდამსხმელი თომას მეთიუ კრუქსი საიდუმლო სამსახურის სნაიპერმა მოკლა. მეორე მცდელობაში დამნაშავედ რაიან რუთი ცნეს, რომელიც წარსულში უკვე ნასამართლევი იყო. ტრამპი არც ამ შემთხვევის შედეგად დაშავებულა.