სახელმწიფო უსაფრთხოების სამსახურმა თაღლითობის და თაღლითობაში დახმარების საქმეზე B.P. TRANS-ის დირექტორი, კომპანიის თანამშრომელი და საზედამხედველო კომპანიის 3 თანამშრომელი დააკავა, ხოლო ძებნა გამოაცხადა ყოფილ დირექტორ ბიჭიკო პაიკიძეზე. ამის შესახებ დღეს, 24 სექტემბერს სუს-ში გამართული ბრიფინგზე უწყების წარმომადგენელმა ისაუბრა.

კომპანია B.P. TRANS-ის 100%-იანი წილის მფლობელი და ვანის საკრებულოში ქართული ოცნების წარმომადგენელი ბიჭიკო პაიკიძე რადიო თავისუფლების ინფორმაციით, სუს-ის ყოფილი უფროსის, გრიგოლ ლილუაშვილის ნათესავია.

როგორც უწყებაში გამართული ბრიფინგიდან ირკვევა, საქმე ეხება რეგიონული განვითარებისა და ინფრასტრუქტურის სამინისტროს კუთვნილი დიდი ოდენობით თანხის — 4 184 249 ლარის მოტყუებით დაუფლებას.

"სახელმწიფოს კუთვნილი 4 მილიონ 184 249 ლარის თაღლითურად დაუფლების ფაქტზე დაკავებულია "ბიპი ტრანსის" დირექტორი ვ.კ. ამავე კომპანიის თანამშრომელი ი.ჭ. და საზედამხედველო კომპანიის 3 თანამშრომელი ხოლო შპს "ბიპი ტრანსის" ყოფილ დირექტორს და 100%-იანი წილის მფლობელს და ამჟამად მიმალვაში მყოფ ბ.პ-ს დაუსწრებლად წარედგინება ბრალდება და მის მიმართ გამოცხადდება ძებნა. საქმე ეხება დიდი ოდენობით თაღლითობას და თაღლითობაში დახმარებას, კერძოდ, საქართველოს რეგიონული განვითარებისა და ინფრასტრუქტურის სამინისტროს კუთვნილი დიდი ოდენობით თანხის მოტყუებით დაუფლების ფაქტს.

ჩატარებულია გამოძიებით დადგენილია, რომ 2021 წლის ივნისიდან 2022 წლის სექტემბრის ჩათვლით ელექტრონული ტენდერით გათვალისწინებული სამუშაოების შესრულების პროცესში ქუთაისი-ალპანა-მამისონის საავტომობილო გზის მონაკვეთის და ონის მუნიციპალიტეტის არეალში სტიქიის შედეგად დაზიანებული ცალკეული მონაკვეთების ნაპირდამცავი ქვაყრილის ლოდების მოწყობით სამუშაოების განხორციელებისას შპს "ბიპი ტრანსის" 100%-იანი წილის მფლობელი ბ.პ ამავე კომპანიის დირექტორს ვ.კ, თანამშრომელ ი.ჭ.ს და ხელშეკრულების შესრულების ზედამხედველი პირების გ.კ-ს რ.ფ-ს და ი.გ-ს დახმარებით მოტყუებით დაეუფლა საქართველოს რეგიონული განვითარებისა და ინფრასტრუქტურის სამინისტროს კუთვნილ 4 მილიონ 184 249 ლარს, რითაც სახელმწიფოს მიადგა დიდი ოდენობით ქონებრივი ზიანი.

აღნიშნულ დანაშაულებრივ ქმედებასთან დაკავშირებით გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 ნაწილის ბ-ქვე პუნქტით და 25/180-ე მუხლის მესამე ნაწილის ბ-ქვე პუნქტით, რაც სასჯელის სახედ და ზომად ითვალისწინებს თავისუფლების აღკვეთას 6-დან 9 წლამდე ვადით.

გარდა ამისა, აღნიშნული საქმის ფარგლებში ჩვენ ვაწარმოებთ ინტენსიურ ოპერატიულ სამძებრო ღონისძიებებს დანაშაულში თანამონაწილე სხვა შესაძლო პირთა მხილების და შესაბამისი სამართლებრივი კვალიფიკაციის განსაზღვრა დაზუსტების მიზნით" — აცხადებს სუს-ი.