"თუ მოგვიწევს NATO-ს საჰაერო სივრცეში ნებართვის გარეშე მოქმედი თვითმფრინავების შეჩერება, ჩვენ ამას გავაკეთებთ," — თქვა დიდი ბრიტანეთის საგარეო საქმეთა მინისტრმა, ივეტ კუპერმა და აღნიშნა, რომ პუტინი NATO-სთან შეიარაღებული დაპირისპირების რისკის ქვეშ დგას. ამის შესახებ ინფორმაციას The Guardian ავრცელებს.

კუპერმა თქვა, რომ რუსეთი კვლავაც "არღვევს საბაზისო ვალდებულებებს გაეროს ქარტიის წინაშე" უკრაინაზე გაძლიერებული თავდასხმებით და პოლონეთის, რუმინეთისა და ესტონეთის საჰაერო სივრცეში "უკიდურესად უპასუხისმგებლო" შეჭრებით.

"ეს უკანასკნელი ქმედებები სახიფათო და უპასუხისმგებლოა. უარეს შემთხვევაში, ეს მიზანმიმართული მცდელობაა, სუვერენული სახელმწიფოების ტერიტორიული მთლიანობისა და ევროპის უსაფრთხოების შესარყევად. ისინი ქმნიან არასწორი გათვლის საფრთხეს, ხსნიან კარს NATO-სა და რუსეთის პირდაპირ შეიარაღებულ დაპირისპირებაზე," — თქვა ივეტ კუპერმა.

მიმართვაში დიდი ბრიტანეთის საგარეო საქმეთა მინისტრმა აღნიშნა, რომ "NATO-ს ერთიანი ძალა შეუდარებელია და მისი მონდომება დაიცვას მშვიდობა და უსაფრთხოება — მტკიცეა."

"პრეზიდენტ პუტინს ვუთხარი: თქვენი უპასუხისმგებლო ქმედებები NATO-სა და რუსეთს შორის პირდაპირი შეიარაღებული დაპირისპირების რისკს აჩენს. ჩვენი ალიანსი თავდაცვითია, მაგრამ ილუზიებში ნუ იქნებით. ჩვენ მზად ვართ გადავდგათ ყველა აუცილებელი ნაბიჯი NATO-ს ცისა და NATO-ს ტერიტორიის დასაცავად. ჩვენ ფხიზლად ვართ. ჩვენ მტკიცედ ვდგავართ, და თუ მოგვიწევს თვითმფრინავების შეჩერება, რომლებიც NATO-ს საჰაერო სივრცეში ნებართვის გარეშე მოქმედებენ, ამას გავაკეთებთ... რუსეთის იმპერიალისტური "ომის მანიაკობა" საფრთხეს უქმნის საერთაშორისო მშვიდობასა და უსაფრთხოებას. ის საფრთხეს უქმნის იმ ღირებულებებსა და პრინციპებს, რომელზეც დგას ეს ორგანიზაცია — ორგანიზაცია, რომელმაც ბოლო 80 წლის განმავლობაში ძალიან ბევრი გააკეთა სტაბილურობისა და კეთილდღეობის მხარდასაჭერად. ჩვენ უნდა შევეწინააღმდეგოთ მას, ჩვენი ყველას გულისთვის", — თქვა ივეტ კუპერმა.