უკრაინის პრეზიდენტი ვოლოდიმირ ზელენსკი ამერიკის შეერთებული შტატების პრეზიდენტ დონალდ ტრამპის სპეციალურ წარმომადგენელს უკრაინის საკითხებში, კიტ კელოგს შეხვდა. ინფორმაციას უკრაინული მედია ავრცელებს და წერს, რომ შეხვედრა გუშინ, 22 სექტემბერს გაიმართა — მათი ცნობით, შეხვედრის მიზანი ფრონტზე არსებული ვითარებისა და უკრაინასა-აშშ-ს შორის სამხედრო თანამშრომლობის გაღრმავების განხილვა იყო.

ზელენსკის თქმით, შეხვედრაზე ყურადღება გამახვილდა დობროპოლიასა და პოკროვსკის მახლობლად უკრაინის კონტრშეტევით ოპერაციებზე, სადაც უკრაინულმა ძალებმა ბოლო დროს წარმატებებს მიაღწიეს.

უკრაინული მედიის ინფორმაციით, საუბარი ასევე შეეხო თავდაცვის სფეროში სამომავლო თანამშრომლობას, მათ შორის დრონების შესახებ შეთანხმებებს და აშშ-ის იარაღის შეძენას.

"ჩვენ ასევე შევეხეთ უკრაინასა და შეერთებულ შტატებს შორის თანამშრომლობის განვითარებას, კერძოდ, დრონების შესახებ ორმხრივად სასარგებლო შეთანხმებებს და ამერიკული იარაღის შეძენას," — აღნიშნა ზელენსკიმ.

ზელენსკი კელოგს ნიუ-იორკში ჩასვლისთანავე შეხვდა. უკრაინის პრეზიდენტი ის ასევე გამართავს მოლაპარაკებებს აშშ-ის პრეზიდენტ დონალდ ტრამპთან და მონაწილეობას მიიღებს გაეროს 80-ე გენერალურ ასამბლეაში, რომელშიც თითქმის 150 ქვეყნის ლიდერები შეიკრიბებიან.

ვიზიტის დროს ზელენსკი ასევე დაესწრება "ბავშვთა დაბრუნების კოალიციის სამიტს", "ყირიმის პლატფორმას" და თითქმის ორ ათეულ ორმხრივ შეხვედრას გამართავს.