ქართული ოცნების თბილისის მერობის კანდიდატის, კახა კალაძის ბანერის დაზიანებისთვის დაკავებულ კოალიცია ცვლილებისთვის ლიდერს, ელენე ხოშტარიას 5 000-ლარიანი საპატიმრო გირაო შეეფარდა, რომლის გადახდის გარეშეც ოპოზიციონერი საპატიმრო დაწესებულებიდან ვერ გათავისუფლდება.

გირაოს გადასახდელად მას 20-დღიანი ვადა აქვს განსაზღვრული. როგორც გავრცელებულ განცხადებაში ელენე ხოშტარია წერს, ჯარიმის გადახდას არ აპირებს.

"გირაოს გადახდა და ამით გამოსვლა არ არის თავისუფლებაზე გამოსვლა, ეს არის ციხის კარის გაღებისთვის ხარკი, რომელსაც, რა თქმა უნდა, არ გადავიხდი. იმიტომ კი არა, რომ თავმოყვარეობას შემილახავს, იმიტომ, რომ ვერანაირი ბრძოლისთვის ვერ მოგიწოდებთ და ვერც ვიქნები ტყუილში და ფარსში მონაწილეობის გზით.

ჩემი პატიმრობა უკანონოა ისევე, როგორც უამრავი თავისუფალი ადამიანის. ოღონდ, პატიმრობა არ არის ბრძოლის გაჩერება, ამას ნამდვილად გპირდებით. გავიმარჯვებთ სახელოვნად! ბოლომდე!

PS: ვინმეს მიერ ჩემი გირაოს შეტანა იქნება ჩემთვის გულში დანის ჩარტყმა, არავის ვაძლევ ამის უფლებას", — ნათქვამია ელენე ხოშტარიას განცხადებაში

ოპოზიციონერისთვის საპატიმრო გირაოს შეფარდების გადაწყვეტილება მოსამართლე არსენ კალატოზიშვილმა მიიღო, რითაც ბრალდების მხარის შუამდგომლობა დააკმაყოფილა.

შეგახსენებთ, კოალიცია ცვლილებისთვის ლიდერი ელენე ხოშტარია 15 სექტემბერს დააკავეს. მას ბრალდება სხვისი ნივთის განზრახ დაზიანების ფაქტზე აქვს წარდგენილი. ელენე ხოშტარიამ 14 სექტემბერს კალაძის ბანერებზე დააწერა: "რუსული ოცნება", "რუსი". მისი თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.

პროკურატურის ინფორმაციით, ელენე ხოშტარიას მიერ კალაძის ბანერებზე გაკეთებულმა წარწერამ "გამოიწვია ქონებრივი ზიანი 570 ლარის ოდენობით".