აზერბაიჯანში Instagram-სა და TikTok-ზე წვდომა შეიზღუდა, მომხმარებლები კი პლატფორმებით სარგებლობას მხოლოდ VPN-ის მეშვეობით ახერხებენ — ინფორმაციას OC Media ავრცელებს.

არსებული ცნობებით, სოციალურ ქსელებთან დაკავშირებული შეფერხება, შესაძლოა, უკავშირდებოდეს სკოლებში ჰიჯაბის შეზღუდვის წინააღმდეგ დაწყებულ საპროტესტო ტალღას. მომხმარებლები ჩივიან პლატფორმების ნელ მუშაობაზე, სიახლეების ველის განახლებისა და ვიდეოების ჩატვირთვის შეფერხებებზე. მიუხედავად იმისა, რომ გლობალური შეფერხება არ დაფიქსირებულა, ხარვეზების მონიტორინგის სერვისებმა აზერბაიჯანიდან შესული საჩივრები დააფიქსირეს.

პროტესტი აზერბაიჯანის მინისტრთა კაბინეტის მიერ სექტემბერში მიღებულ ცვლილებებს მოჰყვა, რომლითაც მოსწავლეებისა და პედაგოგებისთვის "საერო დრესკოდი" დაწესდა. მიუხედავად იმისა, რომ დადგენილებაში ჰიჯაბი პირდაპირ ნახსენები არ არის, სოციალურ ქსელებში გავრცელდა კადრები, სადაც ჩანს, რომ გოგონებს სკოლებში არ უშვებენ, სავარაუდოდ, სწორედ თავსაბურავის გამო. ამას მოჰყვა მოსწავლეთა პროტესტიც, რომლებიც სკოლების გარეთ შეიკრიბნენ და საგაკვეთილო პროცესს ბოიკოტი გამოუცხადეს.

აზერბაიჯანის შინაგან საქმეთა სამინისტროს ცნობით, ბაქოში პირთა ჯგუფი სასკოლო დრესკოდის შემოღების გამო პერსონალს დაუპირისპირდა, დააზიანა საგანმანათლებლო დაწესებულებები და შეეცადა საზოგადოებრივი წესრიგის დარღვევას, რის გამოც 37 ადამიანი დააკავეს.

სოციალური ქსელების შეფერხებასთან დაკავშირებით ოფიციალური კომენტარი ჯერჯერობით არ გაუკეთებიათ არც აზერბაიჯანის ხელისუფლებას და არც კომპანიებს — Instagram-სა და TikTok-ს.