"ქოცები რაც უარესს იზამენ, მით უარესი მათთვის და უკეთესი ქვეყნისთვის. მიდით, მიაწექით "ანტიქართულო ოცნება", ბოლომდე გაიფარჩაკეთ თავი!" — ამის შესახებ კოალიცია ცვლილებისთვის ლიდერი, პატიმრობაში მყოფი ნიკა გვარამია ციხიდან გამოქვეყნებულ წერილში წერს და მისი თანაგუნდელის, ელენ ხოშტარიას დაკავებას ეხმაურება.

ნიკა გვარამიას წერილი სოციალურ ქსელში, მის პირად გვერდზე გამოქვეყნდა.

"ჩვენი კოალიციის გარეთ დარჩენილი ლიდერიც დააპატიმრეს. ახლა უკვე ოთხივე ციხეში ვართ:) ელენე მაგარია, ყველაზე მაგარი! ეგ კი გაუძლებს!

ქოცები კი, რაც უარესს იზამენ, მით უარესი მათთვის და უკეთესი ქვეყნისთვის. მიდით, მიაწექით "ანტიქართულო ოცნება", ბოლომდე გაიფარჩაკეთ თავი!

"იმედია მალე გამოუშვებენ" -ს რატომ არ ვწერ, მართლა იმედია რომ ხვდებით. ლოტოტრონის სამართალში "დაჭერა" მოვარდება თუ "გირაო", მაგაზე მკითხაობით ვერ დავკავდები:)

თავისუფლება ყველა პოლიტპატიმარს!
ოლიგარქია უნდა დაემხოს!" — წერს ნიკა გვარამია.

კოალიცია ცვლილებისთვის ლიდერის, ელენე ხოშტარიას დაკავება შინაგან საქმეთა სამინისტრომ ოფიციალური განცხადებით დაადასტურა. უწყებამ გამოძიება "ნივთის დაზიანების" მუხლით დაიწყო. ოპოზიციონერმა 14 სექტემბერს კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.