ევროკომისიის სპიკერმა საგარეო საქმეთა და უსაფრთხოების პოლიტიკის საკითხებში, ანიტა ჰიპერმა, ქართული ოცნების მხრიდან ევროკავშირის ელჩზე, პაველ ჰერჩინსკიზე თავდასხმებთან დაკავშირებით კითხვას უპასუხა და აღნიშნა, რომ პაველ ჰერჩინსკის ევროკავშირის სრული ნდობა აქვს. მან ქართულ ოცნებას მოუწოდა შეწყვიტონ თავდასხმები ევროკავშირის ელჩზე იმის გამო, რომ ის თავის საქმეს აკეთებს.

"დავიწყებ იმის თქმით, რომ ევროკავშირის ელჩს ჩვენი სრული ნდობა აქვს და მისი სიტყვები ევროკავშირი-საქართველოს რეალობას ასახავს. ხელისუფლების მიმართ ჩვენი გზავნილია, რომ თავისი სამუშაოს შესრულების გამო ჩვენს ელჩზე თავდასხმა შეწყვიტონ.

ქართული მხარისგან რაც ვიხილეთ, სამწუხაროდ, დეზინფორმაციის გავრცელების მასობრივი მცდელობაა და ეს თავდასხმა კიდევ ერთხელ აჩვენებს, რომ ეს არის ადგილზე მიმდინარე მოვლენების, უდანაშაულო მომიტინგეების, სამოქალაქო საზოგადოებისა და პოლიტიკოსების წინააღმდეგ რეპრესიისა და ძალადობის, დამახინჯება. ამიტომ, ჩვენი ქმედებები საქართველოს ხელისუფლების ქმედებებს შეესაბამება", — თქვა ევროკომისიის სპიკერმა საგარეო საქმეთა და უსაფრთხოების პოლიტიკის საკითხებში.

ანიტა ჰიპერმა აღნიშნა, რომ ევროკავშირის ნაბიჯები ქართულ ოცნებასთან პოლიტიკურ დონეზე ყველა კონტაქტის დაქვეითებით და მათთვის ფინანსური მხარდაჭერის შემცირებით, სამოქალაქო საზოგადოებისთვის კი მხარდაჭერის შენარჩუნებით, იწყება.

"ამის შესახებ წინა ჯერზეც ვილაპარაკეთ, მაგრამ ეს იწყება პოლიტიკურ დონეზე ყველა ჩვენი კონტაქტის აბსოლუტური დაქვეითებით და ხელისუფლების ფინანსური მხარდაჭერის ძირეული შემცირებით, სამოქალაქო საზოგადოებისთვის მხარდაჭერის შენარჩუნების პარალელურად," — თქვა ჰიპერმა.

ევროკომისიის სპიკერმა საგარეო საქმეთა და უსაფრთხოების პოლიტიკის საკითხებში უვიზო რეჟიმის შესაძლო შეჩერებასთან დაკავშირებით დასმულ კითხვასაც უპასუხა და აღნიშნა, რომ ქართველ ხალხს მათი ევროკავშირის სრული მხარდაჭერა აქვს.

"აქ ორი საკითხია. უპირველეს ყოვლისა, ქართველ ხალხს ჩვენი სრული მხარდაჭერა აქვს. ქართველი ხალხის გვერდით ვდგავართ.

მეორე, თითის გაშვერა არ გვიყვარს. გვსურს, რომ ვიხილოთ ქმედება და ნამდვილ დიალოგში ჩართულობა, უპირველეს ყოვლისა, საქართველოში სამოქალაქო საზოგადოებასთან, შემდგომ კი განვიხილავთ რა ვარიანტებია მაგიდაზე ამ ურთიერთობის გამოსასწორებლად," — თქვა ანიტა ჰიპერმა.

ცნობისთვის, თბილისის მერმა, კახა კალაძემ ევროკავშირის ელჩს "რადიკალი" უწოდა.