კოალიცია ცვლილებისთვის ერთ-ერთმა წევრმა, შუშანა მაცაბერიძემ კოალიცია ცვილებისთვის ერთ-ერთი ლიდერის, ელენე ხოშტარიას დაკავების დეტალებზე "ფორმულას" ეთერში ისაუბრა. ოპოზიციური პარტიის ლიდერის დაკავების დროს შუშანა მაცაბერიძე მასთან ერთად იმყოფებოდა. მისი თქმით, ელენე ხოშტარია საკუთარი სახლის ლიფტთან დააკავეს, თუმცა უცნობია რომელი უწყების (შსს-ს თუ სუს-ის) წარმომადგენლებმა.

შუშანა მაცაბერიძემ აღნიშნა, რომ ელენე ხოშტარია "სადაც არ უნდა გამოკეტონ" მის ბრძოლას ვერ შეაჩერებენ.

"ჰოლანდიის ელჩთან შეხვედრის შემდეგ დავბრუნდით სახლში. ალბათ, საელჩოსთან ვერ გაბედეს ჩასაფრება და დაკავება. სადარბაზოში შევედით, ლიფტთან მივედით თუ არა გამოგვეკიდა ერთი კაცი და ორი ქალბატონი, რომლებიც ჩართული კამერით მოვიდნენ. გადასცა ტელეფონში, რომ მოვიდნენ აქ არიან და აგვიკრძალეს ლიფტში შესვლა, რაზეც არანაირი წინააღმდეგობა არ გაგვიწევია, რადგან ჩვენ ყველამ კარგად ვიცით რა ბრძოლაშიც ვართ, რისთვისაც ვიბრძვით და ვერც დაჭერით და ვერც რამე სხვა მეთოდებით ვერ მოხერხდება ამ ბრძოლის გაჩერება, ამ პროტესტის შეჩერება და ამოძირკვა — რაც სურს ამ რეჟიმს და რისთვისაც იბრძვის.

არ ვიცით ზუსტად სად გადაიყვანეს. ვიდეოშიც ვეკითხები თუ სად გადაჰყავთ. როგორც იციან ხოლმე სტანდარტული პასუხი — გეტყვით, გეტყვით. და ეს "გეტყვით" მერე არ დგება არასდროს. დაბურულ "შკოდაში" ჩასვეს — ან "შკოდა" იყო, ან "ქემრი", ზუსტად არ მახსოვს, მაგრამ ვიდეოში ჩანს ზუსტად. რამდენიმე ადამიანი იყო. ორი გოგო და ძალიან ბევრი მამაკაცი. ჩვეულებრივი სამოქალაქო მანქანები იყო. ერთი წითელი ჯიპი მახსოვს, საიდანაც გადმოვიდნენ, მერე იქ ჩასხდნენ და მაგით წავიდნენ. არც ერთს არ ეცვა არანაირი მაიდენტიფიცირებელი სამოსი. ან კრიმპოლი არის, ან სუსი. ზუსტად არ ვიცით ჩვენც ახლა გარკვევაში ვართ. ადვოკატი უკვე ჩართულია და ვარკვევთ, თუ სად შეიძლება გადაეყვანათ და შემდეგ, რა თქმა უნდა, იქ მივალთ.

ელენეს პოზიცია ყველასთვის ცალსახაა — ეს საჯარო ამბავია. იმიტომ, რომ მან ღიად და დაუფარავად გააკეთა ის, რაც უნდა გაეკეთებინა. გააკეთა ის, რაც თქვა. მისი ხასიათი არის ასეთი. მისი ბრძოლა არის ისეთი, რომელიც არ აპირებს, რომ გაჩერდეს. რაც არ უნდა იყოს და სადაც არ უნდა გამოკეტონ, ასე ვთქვათ, მის ბრძოლას ვერ შეაჩერებენ. ჩვენ აუცილებლად შევძლებთ, რომ გამოვგლიჯოთ ამ რუსებს ქვეყანა და დავიბრუნოთ ევროპული მომავალი საქართველოსთვის", — განაცხადა შუშანა მაცაბერიძემ "ფორმულასთან" საუბრისას.

ცნობისათვის, კოალიცია ცვლილებებისთვის ლიდერი ცოტა ხნის წინ საკუთარ სახლთან დააკავეს.

შეგახსენებთ, ელენე ხოშტარიამ კახა კალაძის საარჩევნო შტაბთან კალაძის ბანერებზე დააწერა: "რუსული ოცნება", "რუსი". ამით ელენე ხოშტარიამ სოლიდარობა გამოუცხადა 23 წლის აქტივისტ მეგი დიასამიძეს — "სოლიდარობა მეგის!", დაწერა ხოშტარიამ სოციალურ ქსელში და კახა კალაძის ბანერის ფოტო გამოაქვეყნა, რომელსაც აწერია — "რუსი".