თბილისის მერის და ქართული ოცნების თბილისის მერობის კანდიდატის, კახა კალაძის საარჩევნო შტაბთან კოალიცია ცვლილებებისთვის ლიდერის, ელენე ხოშტარიას მიერ კალაძის ბანერის დაზიანების ფაქტზე შსს-მ გამოძიება სისხლის სამართლის კოდექსით დაიწყო. ამის შესახებ განცხადებამ უწყებამ თავად გაავრცელა.

"შინაგან საქმეთა სამინისტრომ, პარტია ქართული ოცნება — დემოკრატიული საქართველოს წარმომადგენლების მომართვის საფუძველზე, საარჩევნო ბანერების დაზიანების ფაქტზე გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

შეტყობინების თანახმად, აღნიშნული ქმედება ჩაიდინა კოალიცია ცვლილებებისთვის ერთ-ერთმა ლიდერმა, ელენე ხოშტარიამ.

სამართალდამცველები ფაქტთან დაკავშირებით საგამოძიებო მოქმედებებს ატარებენ, ექსპერტიზის საფუძველზე დადგინდება ზარალის ზუსტი ოდენობა და აღნიშნულ ქმედებას შესაბამისი სამართლებრივი რეაგირება მოჰყვება", — ნათქვამია შსს-ს მიერ გავრცელებულ განცხადებაში.

ცნობისათვის, კოალიცია ცვლილებებისთვის ერთ-ერთმა ლიდერმა, ელენე ხოშტარიამ კახა კალაძის საარჩევნო შტაბთან კალაძის ბანერებზე დააწერა: "რუსული ოცნება", "რუსი". ამით ელენე ხოშტარიამ სოლიდარობა გამოუცხადა 23 წლის აქტივისტ მეგი დიასამიძეს — "სოლიდარობა მეგის!", დაწერა ხოშტარიამ სოციალურ ქსელში და კახა კალაძის ბანერის ფოტო გამოაქვეყნა, რომელსაც აწერია — "რუსი".

9 სექტემბერს 23 წლის მეგი დიასამიძე კახა კალაძის ბანერზე გაკეთებული წარწერისთვის — "რუსული რეჟიმი" დააკავეს. მის წინააღმდეგ საქმე სსკ-ის 187-ე მუხლით აღიძრა, რაც სხვისი ნივთის დაზიანებას ან განადგურებას გულისხმობს. საბოლოოდ სასამართლომ მეგი დიასამიძეს 2000-ლარიანი ჯარიმა შეუფარდა.

მეტი მეგი დიასამიძის დაკავებაზე: