"კოალიცია ცვლილებებისთვის ლიდერი ცოტა ხნის წინ საკუთარ სახლთან, სავარაუდოდ, დააკავეს. გუშინ, 14 სექტემბერს, კახა კალაძის შტაბთან მის მიერ კალაძის ბანერის დაზიანების აქტზე შსს-მ გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

"შინაგან საქმეთა სამინისტრომ, პარტია ქართული ოცნება — დემოკრატიული საქართველოს წარმომადგენლების მომართვის საფუძველზე, საარჩევნო ბანერების დაზიანების ფაქტზე გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.

შეტყობინების თანახმად, აღნიშნული ქმედება ჩაიდინა კოალიცია ცვლილებებისთვის ერთ-ერთმა ლიდერმა, ელენე ხოშტარიამ.

სამართალდამცველები ფაქტთან დაკავშირებით საგამოძიებო მოქმედებებს ატარებენ, ექსპერტიზის საფუძველზე დადგინდება ზარალის ზუსტი ოდენობა და აღნიშნულ ქმედებას შესაბამისი სამართლებრივი რეაგირება მოჰყვება", — ნათქვამია შსს-ს მიერ გავრცელებულ განცხადებაში.

ცნობისათვის, კოალიცია ცვლილებებისთვის ერთ-ერთმა ლიდერმა, ელენე ხოშტარიამ კახა კალაძის საარჩევნო შტაბთან კალაძის ბანერებზე დააწერა: "რუსული ოცნება", "რუსი". ამით ელენე ხოშტარიამ სოლიდარობა გამოუცხადა 23 წლის აქტივისტ მეგი დიასამიძეს — "სოლიდარობა მეგის!", დაწერა ხოშტარიამ სოციალურ ქსელში და კახა კალაძის ბანერის ფოტო გამოაქვეყნა, რომელსაც აწერია — "რუსი".