ჟურნალისტთა დაცვის კომიტეტი (CPJ) საქართველოს ხელისუფლებას მოუწოდებს გამოიძიოს გასულ კვირას ჟურნალისტებზე განხორციელებული თავდასხმები. ამასთან დაკავშირებით CPJ ვრცელ განცხადებას ავრცელებს, სადაც აღნიშნავს, რომ ნოემბრის შემდეგ ათობით ჟურნალისტი გახდა თავდასხმის მსხვერპლი.

"ჟურნალისტთა დაცვის კომიტეტი (CPJ) მოუწოდებს საქართველოს ხელისუფლებას, სწრაფად გამოიძიოს მინიმუმ ექვს ჟურნალისტზე თავდასხმები, რომლებიც გასული კვირის განმავლობაში თბილისში, ანტისამთავრობო პროტესტების გაშუქებისას მოხდა.

ნოემბრიდან მოყოლებული, ათეულობით ჟურნალისტი გახდა თავდასხმის მსხვერპლი — ზოგჯერ პოლიციისა და ნიღბიანი პირების მხრიდან სასტიკადაც კი — მასობრივი საპროტესტო აქციების გაშუქებისას, რომლებიც მმართველი პარტიის, ქართული ოცნების, გადაწყვეტილებას მოჰყვა, ევროკავშირთან წევრობაზე მოლაპარაკებების შეჩერების შესახებ", — წერია გავრცელებულ განცხადებაში.

ჟურნალისტებზე ძალადობის ფაქტს გამოეხმაურა CPJ-ის ევროპის და ცენტრალური აზიის პროგრამის კოორდინატორი, გულნოზა საიდი. მისი თქმით, საქართველოს ხელისუფლებამ პასუხისგებაში უნდა მისცეს ყველა დამნაშავე პირი, ვინც ჟურნალისტებზე ძალადობს.

"პოლიციის მხრიდან მასშტაბური ძალადობის ფონზე, რომელიც ქართველი ჟურნალისტების მიმართ ფიქსირდება პროტესტების გაშუქებისას, უკანასკნელი თავდასხმები — რომელთა ნაწილი, როგორც ჩანს, მმართველი პარტიის მხარდამჭერებს უკავშირდება — განსაკუთრებით შემაშფოთებელია," — განაცხადა გულნოზა საიდმა, CPJ-ის ევროპის და ცენტრალური აზიის პროგრამის კოორდინატორმა. "საქართველოს ხელისუფლებამ უნდა უზრუნველყოს, რომ ყველა დამნაშავე, ვინც ძალადობს პრესაზე, პასუხისგებაში მიეცეს", — დაამატა მან.

CPJ-ის განცხადებაში ყურადღება გამახვილებულია მელიქიშვილის გამზირზე მომხდარი დაპირისპირებისას დაშავებულ ჟურნალისტებზე. განცხადებაში აღნიშნულია, რა დაზიანებები მიიღეს და რა პრობლემები შეექმნათ ჟურნალისტებს — ლასლო მეზეშს, ქეთო მიქაძეს, ალექსანდრე ქეშელაშვილს, მარიამ ნიკურაძეს, ლიკა ზაკაშვილსა და ქეთევან ხუციშვილს.

"8 სექტემბრის საღამოს ნიღბიანი პირების ნაწილი პარტია ქართული ოცნების, თბილისის მერთან აფილირებულ საარჩევნო შტაბთან, მომიტინგეებს დაუპირისპირდა.

ვიდეოკადრებში ჩანს უნგრელი ჟურნალისტი ლასლო რობერტ მეზეში, რომელსაც პრესის ნიშანი აქვს და სახიდან სისხლი მოსდის, ხოლო თითი მოტეხილი აქვს. მისი თქმით, შენობიდან მამაკაცები გამოვიდნენ, ტელეფონი წაართვეს და სცემეს, მიუხედავად იმისა, რომ ჟურნალისტად იყო იდენტიფიცირებული.

გამოცემა პუბლიკას მიერ გავრცელებულ ვიდეოებში ჩანს, როგორ წაართვეს ქეთო მიქაძესა და ალექსანდრე ქეშელაშვილს ტელეფონები.

ფოტოჟურნალისტმა და OC Media-ს თანადამფუძნებელმა მარიამ ნიკურაძემ CPJ-ს უთხრა, რომ გადაღებისას მას წყალი გადაასხეს.

ნეტგაზეთის რეპორტიორი ქეთევან ხუციშვილი კი ჰყვება, რომ ის შტაბიდან გამოსული პირების კადრებს იღებდა, რომლებიც მომიტინგეებს ნივთებს ესროდნენ, როდესაც პოლიციელებმა და სამოქალაქო ტანსაცმელში მყოფმა პირებმა შეაგინეს, ძალით გაიყვანეს და ერთ-ერთმა პოლიციელმა მას ხელი ჰკრა.

3 სექტემბერს იმავე ადგილზე გამართულ პროტესტზე მმართველი პარტიის ახალგაზრდული ორგანიზაციის ლიდერმა პუბლიკას მთავარ რედაქტორს, ლიკა ზაკაშვილს, დაარტყა ტელეფონზე, ხოლო სხვა პირი მასზე შეაფურთხა", — წერია ორგანიზაციის განცხადებაში.

CPJ ოცნების პარლამენტის თავმჯდომარეს, შალვა პაპუაშვილის განცხადებაზეც ამახვილებს ყურადღებას, სადაც პაპუაშვილი არეულობას "ევროკავშირის მიერ მხარდაჭერილ ექსტრემისტებს" აბრალებს.

"საპარლამენტო სპიკერმა შალვა პაპუაშვილმა ძალადობა "ევროკავშირის მიერ მხარდაჭერილ ექსტრემისტებს" დააბრალა და "გარე დაფინანსებულ მედიას" პარტიის ოფისზე "შეტევის ორგანიზებაში" დასდო ბრალი.

CPJ-მ კომენტარისთვის პოლიციას და ქართულ ოცნებას მიმართა, თუმცა პასუხი არ მიუღია", — წერია განცხადებაში.