"კოალიციის წევრები სრულ სოლიდარობას გამოვხატავთ "პუბლიკის" გუნდისა და ყველა დამოუკიდებელი მედიის წარმომადგენლის მიმართ, რომლებიც რეპრესიის მიუხედავად, მაღალი სტანდარტით აგრძელებენ ჟურნალისტურ საქმიანობას," — ამის შესახებ მედიის ადვოკატირების კოალიციის განცხადებაშია აღნიშნული.

მათი თქმით, ბიძინა ივანიშვილის მმართველობის პირობებში სახეზეა სისტემური ძალადობა დამოუკიდებელი მედიის წინააღმდეგ.

კოალიციის განცხადებით, ყველა ეს ფაქტი ერთიანი სტრატეგიის ნაწილია, რომელიც მიზნად ისახავს ქვეყანაში დამოუკიდებელი მედიის და კრიტიკული ხმის ჩახშობას.

"მედიის ადვოკატირების კოალიცია ეხმიანება ძალადობის ფაქტებს დამოუკიდებელი ონლაინ გამომცემლობა "პუბლიკას" ჟურნალისტების მიმართ.

კოალიციის წევრები სრულ სოლიდარობას გამოვხატავთ "პუბლიკის" გუნდისა და ყველა დამოუკიდებელი მედიის წარმომადგენლის მიმართ, რომლებიც რეპრესიის მიუხედავად, მაღალი სტანდარტით აგრძელებენ ჟურნალისტურ საქმიანობას.

3 სექტემბერს ქართული ოცნების თბილისის მერის კახა კალაძის საარჩევნო შტაბის საზეიმოდ გახსნის პარალელურად მოქალაქეებმა თბილისში, მელიქიშვილის გამზირზე საპროტესტო აქცია გამართეს. "პუბლიკის" რედაქტორის ლიკა ზაკაშვილის განცხადებით, პროფესიული მოვალეობის შესრულების დროს, პოლიციელმა უკანონოდ ხელი შეუშალა, ხელი გადაუგრიხა და გარკვეული დროის განმავლობაში, არ მიეცა მუშაობის საშუალება.

იმავე "პუბლიკის" მიერ გავრცელებული ინფორმაციით, ქართული ოცნების ერთ-ერთმა მხარდამჭერმა "პუბლიკის" ჟურნალისტს ხელი დაარტყა. მოგვიანებით, კიდევ ერთმა მხარდამჭერმა "პუბლიკის" ჟურნალისტს შეაფურთხა. იქ მყოფმა პოლიციელებმა ეს ფაქტები ყოველგვარი რეაგირების გარეშე დატოვეს.

ეს არ არის პირველი შემთხვევა, როდესაც ქართული ოცნების მხარდამჭერები და პოლიცია ჟურნალისტებზე ძალადობენ. ბიძინა ივანიშვილის მმართველობის პირობებში ჩვენ ვხედავთ სისტემურ ძალადობას დამოუკიდებელი მედიის წინააღმდეგ: დღემდე გამოუძიებელია ჟურნალისტებზე ათეულობით ფიზიკური ძალადობის ფაქტი და არ დამდგარა მოძალადეთა პასუხისმგებლობის საკითხი, "ბათუმელებისა" და "ნეტგაზეთის" დამფუძნებელს, სინდისის პატიმარს მზია ამაღლობელს ორი წლის პატიმრობა შეეფარდა.

დამოუკიდებელი მედიის წინააღმდეგ მიღებულია რეპრესიული კანონმდებლობა. ყველა ეს ფაქტი ერთიანი სტრატეგიის ნაწილია, რომელიც მიზნად ისახავს ქვეყანაში დამოუკიდებელი მედიის და კრიტიკული ხმის ჩახშობას.

მედიის ადვოკატირების კოალიცია სრულ სოლიდარობას უცხადებს "პუბლიკის" გუნდს და ყველა დამოუკიდებელი მედიის წარმომადგენელს, რომლებიც რეპრესიებისა, ზეწოლისა და ძალადობის პირობებში აგრძელებენ თავიანთ საქმიანობას საზოგადოების ინფორმირებისთვის," — ნათქვამია განცხადებაში.