რუსეთის პრეზიდენტ ვლადიმირ პუტინისა და ჩინეთის პრეზიდენტ სი ძინპინის პირადი საუბარი შემთხვევით ჩართული მიკროფონის საშუალებით გასაჯაროვდა. Reuters წერს, რომ ისინი ჩინეთში გამართულ მეორე მსოფლიო ომის დასრულებიდან 80 წლის იუბილესადმი მიძღვნილ სამხედრო აღლუმზე ორგანოების ტრანსპლანტაციასა და იმ შესაძლებლობაზე საუბრობდნენ, რომ ადამიანებმა 150 წლამდე ცხოვრება მოახერხონ.

საუბრის ეს ფრაგმენტი პირდაპირ ეთერში სახელმწიფო ტელევიზია CCTV-მ გადასცა, რომელიც სხვა მედიებსაც უზიარებდა მაუწყებლობას, მათ შორის CGTN-ს, Associated Press-სა და Reuters-ს. ჩინეთის რადიოსა და ტელევიზიის ადმინისტრაციის ცნობით, CCTV-ის რეპორტაჟი ონლაინ 1.9 მილიარდჯერ ნახეს, ხოლო ტელევიზიით 400 მილიონზე მეტმა მაყურებელმა უყურა.

როდესაც პუტინი და სი ძინპინი ტიანანმენის ტრიბუნისკენ მიემართებოდნენ, საიდანაც კიმთან ერთად აღლუმს ადევნებდნენ თვალს, პუტინის მთარგმნელი ჩინურად ამბობდა: "ბიოტექნოლოგია უწყვეტად ვითარდება." [ნაწილი გაუგებარი საუბრის შემდეგ თარჯიმანი ამბობს]"ადამიანის ორგანოები უწყვეტად შეიძლება გადაინერგოს. რაც უფრო დიდხანს ცხოვრობ, მით უფრო ახალგაზრდავდები და შესაძლოა უკვდავებასაც კი მიაღწიო."

ამის საპასუხოდ, სი ძინპინი, რომელიც კამერაში არ ჩანდა, ჩინურად პასუხობს: "ზოგი პროგნოზით, ამ საუკუნეში ადამიანებმა 150 წლამდე შეიძლება იცოცხლონ."

ცნობისთვის, ეს მაშინ მოხდა, როდესაც პუტინი და სი ძინპინი ჩრდილოეთ კორეის ლიდერ კიმ ჩენ ინთან ერთად პეკინში, მეორე მსოფლიო ომის დასრულებიდან 80 წლის იუბილესადმი მიძღვნილ სამხედრო აღლუმს ესწრებოდნენ.