"უფლებადამცველებისა და სამოქალაქო საზოგადოების წარმომადგენლების საქმიანობის შეზღუდვით საქართველოს ხელისუფლება თავად არღვევს თავისი მოსახლეობის ადამიანის უფლებებს," — ასე ეხმაურება საერთაშორისო უფლებადამცველი ორგანიზაცია Amnesty International 7 არასამთავრობო ორგანიზაციის ანგარიშების დაყადაღებას.

Amnesty International გავრცელებულ განცხადებაში აღნიშნავს, რომ "ეს რეპრესიები უნდა დასრულდეს".

"საქართველოში სამოქალაქო საზოგადოებისთვის სივრცე ვიწროვდება. ხელისუფლებამ 7 არასამთავრობო ორგანიზაციის ანგარიშები გაყინა და სისხლის სამართლის საქმე აღძრა "საბოტაჟისთვის", ბრალდებით, რომ მათ დააფინანსეს აქციის მონაწილეებისთვის დამცავი აღჭურვილობა. წინა საქმეებისგან განსხვავებით, ამან შეიძლება ორგანიზაციის ლიდერების დაპატიმრება გამოიწვიოს.

დამოუკიდებელი არასამთავრობო ორგანიზაციების "საბოტაჟის მომწყობებად" მოხსენიებით ხელისუფლება მათ საქმიანობას ხელს უშლის და საშიშ გზავნილს უგზავნის სხვა პირებს, რომლებიც ქვეყანაში ადამიანის უფლებებს იცავენ.

უფლებადამცველებისა და სამოქალაქო საზოგადოების წარმომადგენლების საქმიანობის შეზღუდვით საქართველოს ხელისუფლება თავად არღვევს თავისი მოსახლეობის ადამიანის უფლებებს. ადამიანის უფლებების ეს რეპრესიები უნდა დასრულდეს" — ნათქვამია Amnesty International-ის განცხადებაში.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციების საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

NGO-ებს ყადაღა საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში დაედოთ.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".