პირველ ოქტომბერს, 18 საათზე, პუშკინის სკვერში პარტია ევროპული საქართველო აქციას გამართავს და ბიძინა ივანიშვილის კომპანიისთვის, სიმბოლურ ფასად, მიწის გადაცემას გააპროტესტებს. ამის შესახებ თბილისის მერობის კანდიდატმა, ელენე ხოშტარიამ დღეს, 30 სექტემბერს გამართულ ბრიფინგზე განაცხადა.

ელენე ხოშტარიას თქმით, ბიძინა ივანიშვილისთვის და კახა კალაძისთვის კანონი არის კორუფციული სურვილების შესრულების გზა. მისივე თქმით, 21 ოქტომბერს, არჩევნების შედეგად წერტილი დაესმება ისეთ მთავრობას, რომელიც ემსახურება პირად ინტერესებს და ბელადებს:

"ზუსტად ასე, მან [ბიძინა ივანიშვილმა] ქალაქის შუაგულში, პუშკინის სკვერში, გადაწყვიტა თავის სასტუმროს მოუწყოს 1 900 მ2-ზე პარკინგი. წერილში მოითხოვა, რომ ერთ ლარად ქალაქმა მას გადასცეს პარკინგი, იმიტომ რომ კომფორტულად იგრძნოს თავი. სწორედ ამიტომ, ჩვენ არ გვაქვს უფლება, რომ ამას შევეგუოთ."