სტატისტიკური მონაცემების თანახმად საქართველოს გავლით მესამე ქვეყნებში, კერძოდ რუსეთში მეორადი მანქანები ხვდება. ანალიტიკური სააგენტო "ავტოსტატის" ცნობით, 2025 წლის 7 თვეში საქართველოს გავლით რუსეთში 17 800-მდე მეორადი ავტომობილი შევიდა.

"რუსეთის საზღვარზე, საქართველოს სამხედრო გზატკეცილზე ასობით ავტოტრანსპორტიორი დგას. წლის დასაწყისიდან საქართველოდან რუსეთში თითქმის 18 ათასი მეორადი ავტომობილი შემოვიდა. ეს არც იმ ფაქტმა შეაჩერა, რომ საქართველოს ხელისუფლებამ სანქციების მოტივით ავტომობილების პირდაპირი ექსპორტი შეზღუდა", — წერს რუსული მედია.

"ავტოსტატის" აღმასრულებელი დირექტორის, სერგეი ცელიკოვის ინფორმაციით, მეორად ავტომობილებს შორის, კავკასიის ქვეყნის გავლით იმპორტისთვის ყველაზე პოპულარული იყო Volkswagen (2,3 ათასი ერთეული), BMW (2,3 ათასი), Chevrolet (1,5 ათასი), Kia (1,4 ათასი) და Hyundai (1,3 ათასი). ახალი ავტომობილების ხუთეულში შედის Toyota, BMW, Lexus, Mercedes-Benz და Porsche. "ავტოსტატის" ხელმძღვანელის თქმით, ამ გზით იმპორტირებული ავტომობილების 95%-ზე მეტი 2020 წლის მერეა წარმოებული.

"აშშ-დან, კანადიდან და ევროპიდან ავტომობილები ძირითადად საქართველოს გავლით შემოდის რუსეთში. ისინი ჩინეთის აწყობილი არ არის. ისინი ზღვით ჩადიან პორტებში (ბათუმი, ფოთი), შემდეგ კი სხვა ქვეყნებში ხვდებიან. საბოლოოდ, რუსეთი ამ ავტომობილების უდიდესი მომხმარებელი ხდება", — ხაზგასმით აღნიშნა ცელიკოვმა.

ამის პარალელურად, საქართველომ 2023 წლის 26 სექტემბრიდან რუსეთში ავტომობილების ექსპორტი, რეექსპორტი, ტრანზიტი აკრძალა. მაშინ საქართველოს ფინანსთა სამინისტროს შემოსავლების სამსახურმა განმარტა, რომ შეზღუდვები ვრცელდება 1.9 ლიტრზე მეტი მოცულობის ძრავის მქონე ავტომობილებზე, ჰიბრიდულ ავტომობილებსა და ელექტრომობილებზე. დეპარტამენტმა თავისი ქმედებები რუსეთის წინააღმდეგ ევროკავშირის სანქციების მე-11 პაკეტით დაწესებული შეზღუდვებით ახსნა. იმავე წლის 1 აგვისტოდან რუსეთში ავტომობილების შემოშვება უნდა შეწყვეტილიყო.

გავრცელებულ ინფორმაციაზე ქართულ მხარეს კომენტარი ჯერ არ გაუკეთებია.

სტატია განახლდება.