"არანაირი იოლი გასეირნება არ გველის, ყველამ კარგად ვიცით. თავგანწირულ უთანასწორო ბრძოლაში შევდივართ, მაგრამ ეს არის ბრძოლა. ჩვენ რთულად, მაგრამ მაინც მოვახერხეთ ერთობლივ ბრძოლაზე, ერთობლივ სტრატეგიაზე შეთანხმება, ეს ძალიან მახარებს," — ამის შესახებ ლელო-ძლიერი საქართველოს ერთ-ერთმა ლიდერმა ალეკო ელისაშვილმა, რიყის პარკში გამართულ ღონისძიებაზე სიტყვით გამოსვლისას განაცხადა, სადაც პარტიამ გახარია საქართველოსთვის და ლელო-ძლიერმა საქართველომ თბილისის მერობის საერთო კანდიდატი წარადგინეს.

"დღეს მთელ საქართველოს და მსოფლიოს, მტერსაც და მოყვარესაც, ვაჩვენებთ, რომ ჩვენ შეგვიძლია საერთო მიზნისთვის, საქართველოსთვის, ქართველი ხალხის ინტერესისთვის, საქართველოს დაბრუნებისთვის გაერთიანება და ერთ მუშტად შეკვრა. ეს არ უნდოდათ ზუსტად იმათ, აქ რომ ჰქონდათ ოფისი, ამ სულგაყიდულებს, ამ ბაღლინჯოებს. ეს არ უნდოდათ, მაგრამ მოვახერხეთ. ყველანაირი წინააღმდეგობა შეგვიქმნეს, უამრავი დაბრკოლება შეგვიქმნეს, მაგრამ დღეიდან ჩვენ, გახარია საქართველოსთვის და ლელო-ძლიერი საქართველო ერთობლივ ბრძოლას ვიწყებთ საქართველოს დასაბრუნებლად, თბილისის დასაბრუნებლად, ჩვენი თითოეული სოფლისა და კალმით ნახატი ქალაქების დასაბრუნებლად. მერე, საერთო ჯამში, ქვეყანაც დავიბრუნოთ და ჩვენი გადახვეწილი ხალხი დავაბრუნოთ ჩვენს ქვეყანაში, ამოვისუნთქოთ. უნდა დავიბრუნოთ ჩვენი საქართველო. მე პირადად ამ არჩევნებში მონაწილეობას ვუყურებ, როგორც ბრძოლას. არანაირი იოლი გასეირნება არ გველის, ყველამ კარგად ვიცით. თავგანწირულ უთანასწორო ბრძოლაში შევდივართ, მაგრამ ეს არის ბრძოლა. ჩვენ რთულად, მაგრამ მაინც მოვახერხეთ ერთობლივ ბრძოლაზე, ერთობლივ სტრატეგიაზე შეთანხმება, ეს ძალიან მახარებს. როგორც პოლიტიკოსს კი არა, როგორც ქართველს და ამ ქვეყნის მოქალაქეს. იმიტომ, რომ მეც დავიღალე, საკუთარი თავიც დავღალე სხვების ლანძღვით, თათხვით. ერთობლივი ბრძოლით გავახაროთ ყველა, ვისაც ჩვენი იმედი აქვს. მთელი გულით მინდა, სანამ შემიძლია, სანამ ჯანი მაქვს, ჩემს საქართველოს დავუმტკიცო, რომ მისთვის რაღაც გავაკეთე. რომ მოვა მიქელ-გაბრიელი, მასთანაც, ჩემს სამშობლოსთანაც, მშობლებთან, წინაპრებთან, ჩემს შვილებთან ვიყო მართალი, არანაირ ბრძოლას ჩემთვის ფასი არ აქვს, სადაც ხალხის დარდი, გასაჭირი, პრობლემები არ ისმის. ისე გავერთეთ ეს ერთი წელია არავის საყვედურს არ ვეუბნები, ამ პოლიტიკურ ბრძოლაში, რომ ხალხი დაგვავიწყდა საერთოდ. ამ არჩევნებზე, ამ ბრძოლაში განსაკუთრებით უნდა დავაბრუნოთ ხალხის ხმა. არანაირ ბრძოლას ფასი არ აქვს, თუ წინ ყოჩი არ მიგიძღვის, თან ისეთი ფალავანი არ არის, ვისი იმედიც გაქვს," — განაცხადა ალეკო ელისაშვილმა.

როგორც მან აღნიშნა, სწორედ ასეთი კანდიდატია გახარია საქართველოსთვის და ლელო-ძლიერი საქართველოს თბილისის მერობის ერთობლივი კანდიდატი ირაკლი კუპრაძე.