დღეს, თბილისის საქალაქო სასამართლოში მოსამართლე რომეო ტყეშელაშვილმა პროევროპულ აქციებში მონაწილეობისთვის დაკავებული გიორგი ახობაძე უდანაშაულოდ ცნო. მოსამართლემ გადაწყვეტილება მტკიცებულებების არ არსებობიდან გამომდინარე მიიღო.

გიორგი ახობაძეს სისხლის სამართლის კოდექსის 260-ე მუხლის მე-6 ნაწილით ჰქონდა წარდგენილი, რაც დიდი ოდენობით ნარკოტიკული საშუალებების უკანონო შეძენა-შენახვას გულისხმობს. ბრალი 8-დან 20 წლამდე ან უვადო პატიმრობას ითვალისწინებს.

"ამ წუთამდე და ამ წამამდე ხელი და ხმა გვიკანკალებს ჩვენ, ადვოკატებს. წარმოუდგენელია კიდევ გიორგის რა განცდა დაეუფლა. სიტყვებს, ემოციებს თავს ვერ ვუყრი. ერთადერთი მისაღები გადაწყვეტილება იყო დღეს, ერთადერთი ალტერნატივა ჰქონდა მოსამართლეს, მიეღო გამამართლებელი განაჩენი, გამოეტანა გამამართლებელი განაჩენი და ვფიქრობ, მოსამართლემ ვერ შეძლო ამ პირობებში, რომ მიეღო ის არაკანონიერი გადაწყვეტილება, სამწუხაროდ, რასაც ველოდით. შესაბამისად, მივიღეთ ის, რაც მივიღეთ.

გიორგი არის მართალი, გიორგი არის უდანაშაულო და გიორგი ახობაძეს ნარკოტიკული საშუალება არ ჰქონია. ამით უკვე წერტილი დაესვა ყველაფერს და ფარდა აეხადა საგამოძიებო ორგანოს აბსურდს. იმ აბსურდს, რასაც გვთავაზობდნენ თვეების განმავლობაში. გიორგი არის უდანაშაულო," — განაცხადა გიორგი ახობაძის ადვოკატმა, ლაშა ცუცქირიძემ.

გიორგი ახობაძის საქმე

ახობაძე 7 დეკემბერს, აქციიდან სახლში მომავალი გააჩერეს. ახობაძის პირად და მანქანის ჩხრეკას ნეიტრალური მოწმე არ ჰყავდა. ახობაძის საქმეში არ არსებობდა არც მისი ჩხრეკის ვიდეო მასალა, თუ როგორ "აღმოუჩინეს" მას ნარკოტიკული საშუალება. ახობაძე ყოველ სასამართლო პროცესზე 7 დეკემბრის ღამეს დეტალურად იხსენებდა — თუ როგორ განათავსეს მის ჯიბეში ნარკოტიკული საშუალება. ახობაძე ასევე დეტალურად იხსენებდა, თუ როგორ მოიპოვეს მისი პირის ღრუდან ნერწყვის ნიმუში, რაც მოგვიანებით პოლიციამ "სამხილზე" დაიტანა. ახობაძის საქმეში ნარკოტიკულ ნიმუშზე არსებული "ბიოლოგიური სითხეა" ერთადერთი პროკურატურის "სამხილი" ახობაძის წინააღმდეგ.

ექიმი გიორგი ახობაძე პროევროპული აქციებისას სოციალურ ქსელში აქტიურად იძლეოდა რჩევებს, თუ როგორ დაეცვათ თავი მოქალაქეებს ძალადობრივი დარბევებისას და აქციის მონაწილეებს სამედიცინო დახმარებას უწევდა. ახობაძე 7 დეკემბერს დააკავეს, როდესაც ის აქციიდან სახლში ბრუნდებოდა, სადაც ავადმყოფი დედა ელოდებოდა. ბრალდებული მარტო უვლიდა დედას და სასამართლოზე აღმკვეთ ღონისძიებად შიდაპატიმრობის შუამდგომლობა დააყენა, რაც სასამართლომ არ დააკმაყოფილა.

"არ გაითვალისწინეთ და არ მომეცით საშუალება, მიმეხედა დედაჩემისთვის - ჩემი ცხოვრების მთავარი პაციენტისთვის გამეწია ის დახმარება," — განაცხადა ახობაძემ ერთ-ერთ სასამართლოზე.